A duna da Praia da A Calzoa, un dos sistemas dunares máis relevantes do municipio de Vigo xunto cos de Praia de Rodas (no Parque Nacional Marítimo-Terrestre das Illas Atlánticas de Galicia) e Praia do Vao (Espazo Natural de Interese Local), continúa sen medidas de protección un mes despois do derrubamento rexistrado o pasado 4 de febreiro.

Segundo denuncia a asociación ambiental ZOA, a día de hoxe non se adoptou ningunha medida protectora efectiva. Tras o colapso e a destrución do peche, o noiro dunar permanece aberto e accesible, permitindo o tránsito continuado de persoas e animais. Esta situación está a agravar a erosión e a danar un paleosolo de interese xeolóxico que quedou exposto tras a perda de area e vexetación.

Inmediatamente despois do derrubamento, a asociación solicitou a protección perimetral urxente da duna ou, de forma transitoria, a restrición de acceso ao areal ata a implantación de medidas que garantisen a súa integridade. Porén, non se levou a cabo actuación ningunha. A fronte dunar continúa aberta, e con ela, o deterioro do sistema. A entidade lembra que o proceso de degradación viña sendo advertido dende 2018. En febreiro de 2025 xa se rexistraran ante as administracións local e autonómica solicitudes urxentes para a retirada e substitución do peche existente, alertando expresamente do risco certo de colapso.

“Advertiuse e explicouse con detalle que o peche de arame en malla estaba a impedir o achegue de materia orgánica esencial para o desenvolvemento da vexetación e a retención de area. Isto provocaba a desaparición da duna primaria e o desequilibrio do sistema no seu conxunto, con risco grave de colapso. Non recibimos contestación e mesmo a malla foi reforzada onde estaba deteriorada, facéndoa aínda máis tupida”, sinalan. Segundo a documentación trasladada ás administracións, o debilitamento estrutural da duna primaria e a perda da súa capacidade de resiliencia explican que non resistise o último temporal, a diferenza doutros sistemas dunares do municipio que si contaban con peches axeitados e mantiveron a súa integridade.

A asociación subliña que A Calzoa constitúe un enclave litoral de alto valor ecolóxico e que a súa duna está catalogada como hábitat de interese comunitario. Malia isto, denuncia que a administración local non está a garantir a súa protección efectiva, nin sequera no actual contexto de especial vulnerabilidade. Ante a persistencia da inacción, ZOA solicitou ao Servizo do Litoral da Xunta de Galicia e ao Ministerio para la Transición Ecológica y el Reto Demográfico unha intervención urxente que fre e o deterioro e garanta que a xestión e recuperación do ecosistema se realicen conforme a criterios científicos e á normativa ambiental vixente.