A comarca do Condado e da Louriña amenceu hoxe envolta nunha fonda tristura tras coñecerse o falecemento de Severino Novas, coñecido e querido por todos como Seve, unha das figuras máis recoñecibles da música tradicional e das rondallas da zona, ademais dun home profundamente ligado á vida social e cultural do Porriño.

Seve foi secretario da Asociación Cultural de San Xurxo de Mosende, director do Grupo de Gaitas, fundador e director da Rondalla de Santa María do Porriño e tamén un dos rostros máis familiares do mercado municipal, onde atendía o seu posto de peixe. A súa entrega á cultura popular e o seu compromiso coa comunidade convertérono nun referente humano e artístico.

Unha perda moi sentida na comunidade

O Concello do Porriño expresou o seu pesar asegurando que hoxe se despide “con enorme tristura dunha persoa fundamental para a nosa comunidade”, destacando a súa “fonda pegada humana e cultural, que permanecerá para sempre entre nós”.

Tamén desde a A.VV. Galiñeiro de Vincios, onde Seve era director da rondalla, lamentaron profundamente a súa marcha: “Hoxe deixounos o noso peixeiro-gaiteiro-director. Cantas horas e momentos xuntos nos regalaches. Estarás gravado nos nosos corazóns sempre”. A entidade quixo lembrar o lema que Seve lles inculcou e que agora fan seu: “Por nós, pola Rondalla, por Vincios… e hoxe, por ti”.

O alcalde de Gondomar, Paco Ferreira, sumouse ás condolencias destacando que Seve foi “un gran amigo, un referente humano e cultural, cuxa dedicación deixará unha pegada imborrable”.

Desde a Federación de Rondallas da Área Metropolitana de Vigo tamén expresaron o seu pesar pola perda “dun director querido e respectado, que seguirá velando polos rondalleir@s desde onde estea”.

O Festival de Cans perde unha das súas almas máis queridas

O Festival de Cans, no que Seve era xa parte da súa identidade emocional, lamentou profundamente a súa morte. O músico participaba desde as primeiras edicións, primeiro cociñando para convidados, despois servindo navallas no seu mítico posto do Cans Voulevar, e sempre acompañado da súa inseparable gaita.

“Alí onde estaba Seve, había alegría”, lembran desde a organización, que destaca o seu papel nos pasarrúas cos chimpíns e coas bandas de gaitas. “Hoxe apagouse a gaita de Seve e fica máis silenciosa unha parte do noso festival”.

Un legado que permanecerá vivo

A súa compañeira, a súa filla, a familia e amizades recibiron numerosas mostras de apoio nestas horas difíciles. A unanimidade das mensaxes deixa claro que Seve non foi só un músico, senón un símbolo de comunidade, alegría e compromiso coa tradición.

O seu legado humano e cultural permanecerá vivo en cada pasarrúas, en cada ensaio, en cada festa e en cada recuncho do Porriño e da comarca onde a súa gaita fixo sorrir a xeracións.

Boa viaxe, Seve. Sempre na memoria