O alcalde de Vigo, Abel Caballero, garantiu este xoves que o Concello de Baiona poderá conectarse á presa viguesa de Zamáns no caso de que non chova nos próximos días, xa que o encoro do que se abastece, o de Baíña, xa non poderá fornecer auga a semana que vén se non hai precipitacións.

Caballero e o rexedor baionés, Jesús Vázquez Almuíña, mantiveron este xoves unha reunión para pechar os detalles técnicos no caso de que esa conexión sexa necesaria.

Vázquez Almuíña explicou que Baíña está en niveis “bastante baixos” (un 25,8 % de ocupación segundo o último boletín de Augas de Galicia) e que, ademais de contactar co Concello de Vigo, tamén se contactou co de Nigrán e con Augas de Galicia para trasladar a situación e a posibilidade de conectarse coa presa de Zamán a través do municipio veciño nigranés.

“É posible que o fin de semana e a semana que vén comece a chover de forma xa importante e non sexa necesario, pero realizamos estes trámites para, en caso necesario, poder realizalo”, explicou o alcalde de Baiona, que sinalou que, en caso de choivas persistentes, o encoro de Baíña “recupérase ben” e podería estar “ao cento por cento” en dous ou tres semanas.

Con respecto a posibles alternativas para garantir o abastecemento no futuro, Vázquez Almuíña limitouse a constatar que hai varias alternativas sobre a mesa, e pediu que sexan os técnicos, tras un “estudo profundo e a colaboración entre todos”, os que dean “unha solución global”

COOPERACIÓN DESDE VIGO

Pola súa banda, Abel Caballero garantiu que Vigo “nunca xamais negará a auga a ningún municipio da área e que, por tanto, Baiona terá subministración de Zamáns axiña que como a necesite, debido á súa “complexa situación”. No entanto, convidou a facer unha “reflexión colectiva” sobre o abastecemento na comarca, tras lembrar que a presa principal que abastece Vigo, a de Eiras, está a menos do 50 % da súa capacidade e ten auga para 90 días.

Así, o alcalde insistiu en que Vigo xa tomou medidas, como a construción dunha nova potabilizadora, que permite aproveitar máis e mellor a auga embalsada, e adoptou medidas de restrición desde agosto, que permitiron unha redución do consumo do 5 %.

Pero, volveu a advertir, as posibilidades de que unha seca poida deixar a Vigo e ao resto de municipios da zona sen auga “son verosímiles”, polo que repetiu a súa reclamación de medidas de longo alcance por parte da Xunta.

SEGUNDO ENCORO

Respecto diso, reiterou a súa petición de que se constrúa unha pequena presa augas arriba da presa de Eiras, no río Oitavén que, remarcou, tería “cero impacto ambiental”, e permitiría dobrar o volume de auga embalsada.

Esta medida recóllese nun estudo de alternativas que foi entregado en 2022, e que contempla tamén outras actuacións, para garantir a subministración non só a Vigo, senón a outros municipios da área, entre eles o de Baiona (actuacións coas que a Xunta non está de acordo polo seu impacto e custo, e que, en todo caso, deberían ser acometidas polo Goberno polo seu interese xeral, segundo a administración autonómica).

O estudo contempla, ademais da construción dese encoro adicional no Oitavén, unha captación na confluencia do Oitavén e o Verdugo, e un bombeo desde o Miño ata a presa de Zamáns para garantir a subministración a Nigrán e Gondomar.

Abel Caballero reiterou que esas actuacións terían que estar feitas ou iniciadas hai tempo, pero non foi así porque “se está negando” a Xunta, á que pediu “que se poña en modo cooperación”. “Xa empezásemos. Porque o Goberno de España quere que se faga. O Concello de Vigo quere que se faga. E a Xunta de Galicia é a que di que non”, reiterou.