O Consorcio da Zona Franca de Vigo inaugurou este mércores a súa nova incubadora de Alta Tecnoloxía StartTIC, co obxectivo de dar un “impulso definitivo” a 30 proxectos innovadores. No acto de benvida, a primeira persoa en intervir foi o delegado do Estado, David Regades, quen celebrou a primeira edición desta aceleradora e destacou que a convocatoria recibiu máis de 90 proxectos, dos que 30 foron seleccionados.

Regades puxo en valor a importancia da colaboración público-privada, “fundamental” á hora de impulsar novas iniciativas emprendedoras. Tamén quixo subliñar o peso que o emprego tecnolóxico ten na área de Vigo, que supera o 13,5% do total, máis do dobre que a media estatal (6%).

O presidente da Cámara de Comercio de Pontevedra, Vigo e Vilagarcía de Arousa, José García Costas, que promove StartTIC, indicou que a incubadora asesorará e acompañará os proxectos para lles permitir medrar. “Ese é o obxectivo”, reivindicou.

O xerente do Centro Tecnolóxico Gradiant, Fernando Jiménez, que tamén impulsa a aceleradora, amosou o seu orgullo por poder axudar ao crecemento destes novos proxectos, e agarda que acaden o éxito, mentres que Javier Collado, director xeral da Fundación Instituto Cameral para la Creación y Desarrollo de la Empresa (Incyde), que financia StartTIC, agradeceu o labor de todos os emprendedores e confiou en que todos os proxectos sexan moi pronto unha realidade.

O encargado de pechar o acto foi o alcalde de Vigo e presidente de Zona Franca, Abel Caballero, quen avanzou que el mesmo se reunirá a semana que vén co ministro de Hacienda, Arcadi España, para solicitar máis recursos para este tipo de iniciativas. “A inmensa maioría destes proxectos van ser grandes proxectos de éxito, porque se dan as circunstancias“, reivindicou Caballero, subliñando a importancia desta aceleradora.

PROXECTOS

Segundo destacaron, a maior parte das iniciativas seleccionadas son de Vigo (14), aínda que tamén hai doutras zonas da área viguesa como Cangas, Tui, Marín ou Mos; do resto de Galicia: A Coruña, Lugo, Pontevedra, Ourense, Santiago e Vilagarcía; doutros puntos de España como León; e un proxecto procedente de Portugal. Na maioría dos casos trátase de proxectos de recente creación ou en fases temperás de desenvolvemento, aínda que tamén destaca a presenza de startups e proxectos constituídos, que supoñen case un terzo do total.