O presidente da Xunta, Alfonso Rueda, enviou unha carta ao alcalde de Vigo, Abel Caballero, na que lle pide “lealdade institucional” e non “confrontacións estériles” para que a cidade olívica poida ser sede do Mundial de Fútbol 2030. Desta maneira, o líder autonómico responde a unha segunda misiva enviada polo rexedor sobre o tema, na que Caballero lle pide unha reunión “ao máis alto nivel” que inclúa tamén ao presidente da Deputación, Luís López.

Agora, Rueda explícalle que o Executivo autonómico está disposto a asistir ao devandito encontro que convoque o Concello, ao cal acudirá o conselleiro de Presidencia, Xustiza e Deportes, Diego Calvo, que é o encargado de liderar este tema.Alfonso Rueda lémbralle a Caballero que xa en 2022 a Xunta mostrouse a favor de apoiar a Vigo como sede do Mundial. “Por iso, non se pode traballar doutra forma que non sexa con garantías, transparencia, rigor e lealdade institucional”, reivindica Rueda, esperando que non haxa “confrontacións estériles”.

“Un ruído sen fundamento que non contribúe a máis nada que a xerar polémicas que a Xunta de Galicia, desde logo, non está a alimentar”, subliña o presidente autonómico.

APOIO “INEQUÍVOCO”

El insiste no apoio “inequívoco” da Xunta para que Vigo sexa sede do mundial, esperando que os investimentos necesarios sexan financiados a partes iguais polo catro administracións: Concello, Deputación, Xunta e Goberno central (a pesar de que Caballero elimina da ecuación ao Goberno). Rueda avanza que “hai moito traballo por diante” e que é necesario coñecer os pasos que deu o goberno local para chegar a tempo ao Mundial, polo que espera que na reunión proposta por Caballero poidan coñecerse máis datos, e que a ela acuda tamén o Goberno, insiste.

Na mesma liña falou precisamente Diego Calvo. Nun audio enviado aos medios de comunicación dixo que Caballero “parece que está máis interesado en enredar que en pór solucións”. O conselleiro subliñou que a Xunta “desde o principio” mostrou o seu apoio á candidatura de Vigo, polo que acudirá á reunión prevista por Caballero, na que espera que tamén haxa representación do Goberno central.