O BNG de Vigo pediu ao alcalde, Abel Caballero, que esixa á Xunta de Galicia a suspensión dos proxectos de interese autonómico (PIA) do Ofimático e Santa Cristina, onde se prevé a construción de miles de vivendas públicas. Nun comunicado, o Bloque solicitou que se paralice “calquera ameaza de expropiación ou ocupación forzosa”, trasladándolle ao Goberno galego o rexeitamento do Concello á imposición destes proxectos, para que se revisen atendendo ás reivindicacións dos veciños.

O portavoz nacionalista, Xabier Pérez Igrexas, insistiu ao alcalde que “pase das palabras aos feitos”. “O único que recibiron os veciños afectados do Concello ata o momento son fotografías amables, boas palabras e palmadas nas costas”, criticou. Igrexas apuntou á “contradición” do rexedor, “por defender a necesidade destes proxectos urbanísticos e por facilitar o abaratamento dos terreos cunha recualificación regresiva dos mesmos na novo PXOM, que só contou co voto en contra do BNG”.