O alcalde de Vigo, Abel Caballero, confirmou este luns que Baiona xa está a recibir auga procedente do sistema vigués e insistiu en que o Concello olívico “non está obrigado” a prestar este servizo. “Podo cortar mañá a subministración a Nigrán e a Baiona”, chegou a advertir o rexedor en declaracións remitidas aos medios. Caballero reivindicou que Vigo “acaba de resolver un problema importantísimo” de Baiona, municipio que, segundo afirmou, “estaba a piques de quedar sen auga”, e contrapuxo a actuación do Concello coa da Xunta.
“Se Vigo non chegase a intervir, e quérollo dicir aos cidadáns de Baiona, a Xunta de Galicia deixaría Baiona sen auga”, sostivo. As declaracións chegan despois de que a Consellería de Medio Ambiente rexeitase que o abastecemento a Baiona se presentase como unha mostra de xenerosidade de Vigo e lembrase que a auga é un recurso público e que o propio plan municipal de xestión do risco de seca contempla a posibilidade de achegar auga ao Val Miñor.
“QUEN LEVA A AUGA A BAIONA É VIGO”
Caballero replicou que, ao seu xuízo, a cuestión fundamental non é a titularidade do recurso, senón quen dispón das infraestruturas necesarias para facelo chegar aos municipios. “O que importa é como se sostén un encoro e como se leva a auga aos concellos. E quen leva a auga ao Concello de Baiona é Vigo”, afirmou. Segundo explicou, o Concello modificou parcialmente o seu sistema de abastecemento para liberar recursos do encoro de Zamáns.
Áreas como Valladares, Zamáns e Saiáns, que anteriormente recibían auga deste encoro, están sendo abastecidas mediante auga procedente de Eiras bombeada ata o depósito de Valladares. “Estamos facendo un bombeo e abastecemos zonas enteiras de Valladares, de Zamáns e de Saiáns a través de bombear auga ao depósito de Valladares e darlle desde alí en vez de darlle desde o encoro de Zamáns”, explicou. O alcalde incidiu ademais en que esta operación ten un custo económico: “Por certo, custa cartos bombear”.
NOVO CHOQUE COA XUNTA
Caballero volveu criticar a resposta da Xunta, que sostén que Vigo non pode presentar o abastecemento a Baiona como unha concesión voluntaria. “En vez de agradecer a xenerosidade de Vigo, din que estamos obrigados. Non, non, non estamos obrigados”, respondeu. O rexedor insistiu en que o Concello podería interromper esa achega e utilizou esa posibilidade para defender que se trata dunha decisión municipal. A disputa entre ambas administracións esténdese tamén ao estado da rede de abastecemento viguesa.
Caballero reiterou que as fugas da rede municipal se sitúan pouco por riba do 6%, fronte ao dato superior ao 20% que atribúe a Augas de Galicia. O alcalde cualificou esa discrepancia como unha mostra da “desvergoña política da Xunta de Galicia” e acusou o Goberno autonómico de “atacar Vigo” cando, segundo defendeu, é o Concello quen está asumindo funcións que corresponderían á administración autonómica. Finalmente, Caballero volveu reclamar o cesamento da conselleira de Medio Ambiente e Cambio Climático, Ángeles Vázquez.
A XUNTA ADVIRTE A CABALLERO DE QUE AUGAS DE GALICIA INTERVIRÁ SE AMEAZA CON CORTAR A AUGA A BAIONA E NIGRÁN
A Xunta de Galicia advertiu este martes ao alcalde de Vigo, Abel Caballero, de que Augas de Galicia intervirá para garantir o abastecemento a Baiona e Nigrán se o rexedor persiste na súa “actitude ameazante”. Así o trasladou a delegada territorial do Goberno galego en Vigo, Ana Ortiz, que insistiu en que Caballero “sabe ou debería saber que a auga non é da súa propiedade”.
Segundo subliñou Ortiz, a subministración deste recurso público á poboación é “unha obriga incompatible coa arbitrariedade dun alcalde que pretende utilizala como instrumento de confrontación política”. As declaracións chegan despois de que Caballero afirmase que Vigo xa está a subministrar auga a Baiona desde este luns, malia soster que non está obrigado a facelo, e advertise de que podería “parar mañá” esa achega.
A XUNTA ACUSA A CABALLERO DE ACTUAR “DE MANEIRA TOTALMENTE INSOLIDARIA”
A delegada territorial acusou o alcalde de Vigo de servirse da auga “de maneira totalmente insolidaria” nun contexto de escaseza. Segundo afirmou, Caballero pretende “atribuírse a potestade de decidir unilateralmente quen pode ter auga e quen non”. Ortiz advertiu de que, se o rexedor mantén esa posición, a administración autonómica actuará para asegurar a continuidade da subministración aos dous municipios do Val Miñor. “De persistir na súa actitude ameazante, sería Augas de Galicia quen interviría, coa lei na man, para garantir a subministración a Baiona e a Nigrán”, concluíu.
