O pleno do Concello de Vigo aprobou este luns, por sétima vez no que vai de ano, unha moción do grupo socialista para reclamar á Xunta e á Deputación de Pontevedra que cofinancien, xunto coa administración local, a implantación de rutas no aeroporto de Peinador. A proposta, similar ás debatidas xa nos plenos de xaneiro, marzo, abril, maio, xuño e xullo, reclama que as tres administracións acheguen financiamento a partes iguais para licitar contratos de promoción turística destinados a aeroliñas que establezan conexións desde o aeroporto vigués.
O voceiro do Goberno local, Carlos López Font, pediu á Xunta e á Deputación “deixarse de mentiras” e asumir que, ao seu xuízo, “os voos se conseguen con contratos publicitarios directos”, como asegura que acontece noutras cidades galegas. Por iso, cualificou de “ridícula” a proposta de financiar campañas de promoción no destino sen vinculalas directamente á implantación de rutas. “Publicidade sen avións? Sen destinos concretos?”, cuestionou. López Font insistiu en que “a Xunta e a Deputación teñen que implicarse e pagar a terzos” e asegurou que AENA avala a posición do Concello, ao tempo que acusou o PP de non apoiar historicamente Peinador.
PP REIVINDICA O PACTO POR PEINADOR
Desde o Partido Popular, a súa voceira municipal, Luisa Sánchez, defendeu o chamado Pacto por Peinador, do que, segundo lembrou, se desmarcou o alcalde, Abel Caballero. “A cultura do alcalde non é pactar, é rebentar todo para logo vender agravios e vitimismo”, criticou. Pola súa banda, o voceiro municipal do BNG, Xabier Pérez Igrexas, cuestionou que o Concello asuma competencias en materia aeroportuaria cando, segundo apuntou, non lle corresponden. “Son competentes para o que queren”, ironizou. O nacionalista lembrou ademais que o modelo municipal de subvención a aeroliñas custou case 12 millóns de euros nos últimos anos e sostivo que, a pesar dese investimento, Peinador conta actualmente coa “menor oferta de rutas”.
UN DEBATE TAMÉN EN CLAVE ELECTORAL
Na súa quenda final, López Font rexeitou o pacto formulado polo PP, ao considerar que suporía que “pague o Concello”. O voceiro socialista levou tamén o debate ao terreo electoral e acusou Luisa Sánchez, candidata do PP á Alcaldía, de buscar “publicidade” de cara ás próximas eleccións. Segundo afirmou, a dirixente popular pretende que “figure o logo da Deputación” nas actuacións de promoción aeroportuaria e vaticinou que seguirá “o mesmo camiño que as súas antecesoras”, abandonando o Concello tras os comicios. “O que vostede quere é publicidade nunha campaña electoral que vai perder”, concluíu. A moción saíu finalmente adiante cos votos do PSOE e o rexeitamento do PP e do BNG.
