Nofumadores.org denuncia a “incoherencia” de que a Xunta permita fumar nas Illas Cíes, un dos principais reclamos turísticos de Galicia e candidata ao título de Patrimonio da Humanidade da Unesco, e pide que acabe coa súa permisividade fronte ao tabaco prohibindo fumar en toda a illa.
Na súa opinión non existe política antitabaco neste parque natural, o que cualifica de “vergoñosa e lamentable”, xa que se pode fumar en calquera parte, incluídas praias, zonas forestais e áreas de acampada. A organización alerta do risco de incendio, a presenza de cabichas e a “pésima mensaxe conservacionista” que supón permitir fumar nun espazo que “publicita á praia de Rodas como a “mellor praia do mundo” mentres os campistas, empregados e visitantes fuman en todo o Parque Nacional”. A presidenta de Nofumadores.org, Raquel Fernández Megina, sinala que “non existe nin un só cartel de prohibido fumar, nin no cámping nin en toda a illa. Non o hai nas terrazas cubertas onde nenos e familias xogan ao parchís e ás cartas rodeados de fume, xunto á zona infantil e o cinema de verán”.
“O propio autoservizo do cámping carece de sinais na terraza pechada, e o máis grave, é que se habilitou ilegalmente como zona de fumadores para os empregados, un salón, que se usa como restaurante durante as comidas, filtrando o fume ao resto do establecemento e as cociñas, algo expresamente prohibido pola Lei do Tabaco”, engade.
“A incoherencia”, sinala a organización, “vai aínda máis aló”, xa que as normas da Xunta prohiben acender lume, algo que non inclúe, aparentemente, ao descontrol de permitir acender cigarros en toda a Illa. Ademais, “cada vez é máis frecuente a presenza nas Cíes de vapeadores e dispositivos de tabaco quentado, coas súas baterías inflamables e os residuos plásticos e de metais pesados que supoñen un risco engadido“, afirma a organización. Nofumadores.org subliña a incoherencia entre a candidatura das Illas Cíes a Patrimonio Mundial da Unesco, promovida polo Concello de Vigo para difundir os seus valores ambientais e reforzar a súa protección, e a actual permisividade cara ao tabaco en todo o parque.
A asociación denuncia que, mentres a Xunta prohibe levar mascotas ás Cíes por non confiar na “boa vontade” dos seus donos para evitar que causen alteracións e dano ás especies protexidas da illa, concede un trato de privilexio aos fumadores. No folleto oficial, a única recomendación aos fumadores é “levar as cabichas”, algo que na práctica non se cumpre, xa que “as cabichas son visibles desde a chegada ao embarcadoiro, onde os adictos á nicotina apresúranse a acender cigarros tras un curto traxecto en ferry”.
80.000 FIRMAS PARA PROHIBIR FUMAR EN PARQUES NACIONAIS
Nofumadores.org recolleu ata a data case 80.000 firmas en Change.org para conseguir que o Goberno prohiba fumar en todos os Parques Nacionais. “No mundo, son multitude os espazos naturais que lle pecharon a porta ao tabaco. Nin en Yellowstone, nin nos parques nacionais de Canadá, nin nos grandes bosques de Australia ou Nova Zelandia tolérase fumar fóra de áreas moi concretas e sinalizadas”, explican.
Así mesmo, a asociación tamén ten en marcha en Change.org unha petición de Praias sen Fume que xa recolleu case 384.000 firmas e que pide ao goberno central que todas as praias españolas estean libres de fume e cabichas para protexer tanto a saúde pública como o medioambiente.
