O BNG de Vigo reclamou este martes ao goberno municipal que implemente un “verdadeiro plan de tráfico” para evitar “o caos circulatorio” durante a campaña de Nadal e para que non se repitan “situacións de inseguridade” como “as que se viviron en anos anteriores”. O portavoz municipal nacionalista, Xabier Pérez Igrexas, denunciou que aínda non se coñecen as medidas que porá en marcha o goberno de Abel Caballero e lembrou que este ano, a posta en marcha dun segundo mercadillo na praza de Vialia, pode provocar un “colapso” na zona.

“Queremos saber que medidas vai adoptar o goberno local para evitar que, un ano máis, o modelo caprichoso de Caballero converta o Nadal nun calvario insoportable e inseguro”, proclamou o concelleiro. Pérez Igrexas advertiu de que “non basta cun par de planos ou anuncios que nunca se concretan en nada”, senón que “hai que tomar medidas de verdade”, e trasladou algunhas das propostas do BNG para afrontar esas semanas.

Así, o grupo nacionalista expuxo pór en marcha un plan de transporte público que reduza a entrada de vehículos na cidade. Dito plan contempla lanzadeiras de bus e aparcadoiros disuasorios no Ifevi ou en zonas portuarias; medidas para dar preferencia aos taxis e buses urbanos; asegurar corredores de emerxencia; ou reforzar os efectivos de Policía Local e de Protección Civil. Para o portavoz do BNG “a obsesión polas grandes masas que raia no patolóxico do alcalde non pode pór en risco a seguridade, a convivencia nin a habitabilidade da cidade durante varios meses”.