O tribunal de xurado encargado de axuizar o chamado crime de Coia, en Vigo, considerou por unanimidade culpable de asasinato ao acusado José Luís M.C. Non entanto, considerou acreditadas a existencia de tres circunstancias atenuantes: a confesión, a alteración psíquica e o medo, polo que as acusacións tiveron que rebaixar a súa petición de penas.

Así, a Fiscalía pasou de solicitar penas que sumaban case 22 anos de cárcere a penas que suman case 17 anos de prisión polo asasinato e a tenencia ilícita de armas, mentres que a acusación particular igualmente rebaixou a súa petición de penas até sumar case dezasete anos de cárcere. A defensa, pola súa banda, considera que dadas estas atenuantes é posible rebaixar en dous graos as penas solicitadas. Por iso, solicita unha pena de catro anos polo delito de asasinato, e estima que, pola tenencia ilícita de armas, a pena debe ser inferior a tres meses e non cabería a prisión.