A Fiscalía solicita tres anos de prisión para un home acusado de estafar a unha muller a través dun falso anuncio de aluguer dun piso en Vigo publicado na plataforma Idealista en xullo de 2024.

Segundo o escrito de acusación, o home actuou coa “intención de obter un beneficio económico ilícito”, ofrecendo un inmoble inexistente a través de Internet. A vítima contactou con el interesada en alugar a vivenda e, tras varias conversas, o acusado pediulle que fixese un pago por adiantado para formalizar a reserva.

A muller envioulle un documento no que se comprometía a aboarlle 750 euros en concepto de reserva, e no que tamén se estipulaba que, se o piso non era do seu agrado, o diñeiro sería devolto. O acusado asinou o escrito para darlle aparencia de veracidade, e a vítima realizou tres transferencias mediante ‘bizum’: dúas o 12 de xullo (de 500 e 250 euros) e unha terceira o 16 de xullo, de 450 euros, supostamente correspondente ao primeiro mes de alugueiro.

O ACUSADO NON ASISTIU ÁS CITAS E BLOQUEOU A VÍTIMA

A Fiscalía sostén que o acusado concertou varias citas coa vítima para visitar o piso, mais non se presentou a ningunha delas, mantendo o engano ata que decidiu bloqueala no teléfono para evitar máis comunicacións.

O Ministerio Público considera que estes feitos constitúen un delito de estafa, e lembra que o home xa foi condenado en dúas ocasións anteriores, en 2023 e 2024, por actuacións semellantes.

O caso será xulgado no Xulgado de Instrución número 2 de Vigo, que deberá determinar se o acusado reincidiu nun modus operandi baseado na fraude a través de anuncios de aluguer falsos, un tipo de engano que se ten incrementado nos últimos anos co uso das plataformas dixitais.