O Morrazo, a principal área bilingüe de Galicia
Todas as enquisas demolingüísticas realizadas en Galicia indican a importancia do territorio na distribución da lingua, así como a súa relación coa idade e con outras variables importantes como a formación, a economía, a renda ou incluso o xénero das persoas.
De feito, a análise realizada polo Observatorio da Cultura Galega da evolución sociolingüística galega entre 1992 e 2008, utilizando unha clasificación de dinamismo dos concellos, conclúe que “a maior renda, nivel de urbanización, xuventude e nivel formativo da poboación, menor é a proporción de uso do galego e maiores son a do uso do castelán e, en xeral, a presenza dos colectivos bilingües”.
só dúas comarcas galegas sON consideradas bilingüES POLA RAG, LUGO ORIENTAL E O MORRAZO
Tamén os resultados das últimas investigacións da Real Academia Galega, “Lingua e Sociedade en Galicia. A evolución sociolingüística 1992-2013” , dispoñibles tamén en formato resumido, sinalan que só o 30% das áreas comarcais galegas teñen máis dun 80% de galegofalantes predominantes, o cal, pasado a un formato numérico, quedaría en que só 6 das 20 áreas comarcais galegas son áreas galegofalantes.
Estas zonas correspóndense coa Coruña suroriental (Arzúa, Ordes e Terras de Melide), Costa da Morte (Bergantiños, Fisterra, Muros, Terra de Soneira e Xallas), Lugo oriental
(A Fonsagrada, Os Ancares e Terra de Lemos), O Carballiño e O Ribeiro,
Ourense sur (Limia, Baixa Limia, Terra de Celanova, Verín e Viana) e Pontevedra
nororiental (Deza e Tabeirós, Terra de Montes).
“Porén, esta grande extensión territorial do galego non leva consigo un gran tamaño poboacional, xa que este 30% das áreas comarcais non equivale máis que a un 15%” dos habitantes, sostén o informe da RAG.
De tal xeito e segundo os achados da academia, habería só dúas comarcas en Galicia realmente bilingües, O Morrazo (con presencia principal do castelán) e Lugo Oriental (co galego coma lingua hexemónica).
Seguindo a lóxica de maior número de castelanfalantes nas áreas máis urbanizadas, mentres que a porcentaxe de galegofalantes na comarca de Vigo é do 27%, no Morrazo chega ao 39,9%. Coma pode apreciarse no seguinte gráfico, a porcentaxe de galegofalantes nas comarcas de A Coruña, Betanzos, Ourense e Vigo, como xa relatamos en Xdv, non chega ao 30%.
Como dixemos, as áreas predominantemente castelanfalantes correspóndese
coas zonas urbanas galegas máis poboadas. Polo tanto, as dúas áreas comarcais onde o galego ten unha menor presenza, 29,4% e 27% respectivamente, correspóndense cun terzo da poboación galega.
AUMENTAN OS CASTELANFALALANTES
O mapa da distribución de frecuencias, segundo a análise da RAG, presenta “unha visión moi clara da situación sociolingüística galega. Esta situación caracterízase por unha presenza case paritaria de galegofalantes e castelanfalantes.
Neste contexto, existen arredor de 1.200.000 castelanfalantes dos cales máis de 564.000 residen en dúas áreas comarcais ( A Coruña e Betanzos, Vigo) seguidos pola comarca Ferrol-Eume-Ortegal”.
Por outra banda, habería aproximadamente uns 1.300.000 galegofalantes que se distribúen dunha forma máis heteroxénea que os castelanfalantes.
“Os profundos cambios sociais da comarca do Morrazo están provocando unha aceleración do desprazamento do galego polo castelán“, postulan dende a RAG. Elaboraron un criterio restritivo de comarcas bilingües considerando aquelas que teñan un 60% ou máis de bilingües, e na primeira aproximación aos resultados, denomináronse dúas áreas comarcais como bilingües: O Morrazo (61,7%) e Lugo oriental (A Fonsagrada, Os Ancares e Terra de Lemos; 60%).
O perfil sociolingüístico destas dúas comarcas é diferente xa que, mentres O Morrazo se caracteriza por ser unha área bilingüe de corte castelanfalante, Lugo oriental é unha área bilingüe galegofalante (53,6%). Con todo, as diferenzas entre estas dúas áreas non acaban aí, senón que tamén abarcan aspectos xeográficos, demográficos ou socioeconómicos, moi ligados aos resultados sociolingüísticos.
A zona de Lugo oriental é unha zona xeograficamente montañosa, rural e que limita con Asturias e Castela e León, comarca dunha grande extensión territorial con pouca poboación (1,5% do total de Galicia). Esta área inclúe unha das entradas a Galicia desde a península
por onde transcorre o Camiño de Santiago e que pode estar influíndo en que zonas predominantemente galegofalantes fagan un uso bilingüe, amais de que a poboación galega realice parte da súa vida cotiá fóra dos límites territoriais de Galicia.
Por último, esta área estase a transformar en destino turístico de montaña onde o patrimonio cultural galego está a converterse nun valor que favorece a retención do galego a través duns usos bilingües. Pola contra, a península do Morrazo ten un tamaño xeográfico menor, é unha zona costeira ligada á pesca, galegofalante e socialmente deprimida.
Non obstante, durante estes últimos anos, está a converterse en zona turística
e nun territorio residencial de Vigo, especialmente de clases máis acomodadas. Estes cambios están modificando, como iremos analizando, a sociolingüística da comarca. Neste caso, O Morrazo converteuse na maior área comarcal bilingüe castelá de Galicia, superior incluso a comarcas como Ourense, Ferrol-Eume-Ortegal ou A Coruña e Betanzos.
AS ZONAS PERIURBANAS, ÁS MÁIS CASTELANIZADAS
Os grandes centros urbanos non foron os máis afectados na perda de galegofalantes monolingües na primeira década do século XXI. En realidade, o perfil máis afectado foi o periurbano. Estes resultados confirman a existencia dos movementos migratorios das clases medias dos centros urbanos cara á periferia na busca de lugares máis favorables para residir.
As taxas máis negativas se corresponden co periurbano das grandes cidades galegas: Vigo (Nigrán, Redondela, Cangas, Moaña etc.), Pontevedra (Marín, Bueu), Santiago de Compostela (Ames), Coruña (Sada, Oleiros etc.), Ferrol (Ares, Fene, Neda, Narón etc.), Lugo (Rábade, Outeiro de Rei etc.) ou Ourense (Pereiro de Aguiar).
O desprazamento de monolingües en galego durante estes anos tamén afectou ao territorio caracterizado por ser entrada a Galicia (Ribadeo, Carballeda de Valdeorras, Tui, Arbo, A Guarda), concellos con intereses turísticos (Allariz, A Pobra do Caramiñal, Manzaneda, Sanxenxo, Miño), concellos con algunha singularidade (Avión, concello cunha significativa emigración mexicana) ou vilas urbanas (Vilagarcía de Arousa, Monforte de Lemos).
Poucos foron os concellos que mantiveron ou aumentaron a taxa de monolingües e
estes están caracterizados por unha poboación escasa, con medias de idade
alta e moi relacionada co sector primario (Tordoia, Toques, San Xoán de Río,
Ponte-Caldelas, Mañón, Cerdido). As áreas comarcais do Morrazo, Ourense, Ferrol-Eume-Ortegal, A Coruña-Betanzos e Vigo perderon o 20% dos seus galegofalantes entre 2008 e 2013.
Stellantis Vigo volverá parar do 23 ao 29 de agosto por falta de microchips
A planta do grupo Stellantis en Vigo (antes PSA Peugeot Citroën) suspenderá a súa produción durante a próxima semana, do 23 ao 29 de agosto, segundo trasladaron fontes da empresa ao persoal, debido a problemas de aprovisionamento de compoñentes, que teñen a súa orixe na chamada ‘crise dos microchips’, agravada agora pola situación da pandemia de Covid en Malaisia.
Esta parada producirase só unha semana despois de que a factoría renovase a súa actividade despois das vacacións de verán. A empresa trasladou que a falta de semiconductores (microchips) mantense a nivel mundial e que a situación segue sendo “crítica”.
No caso de Malaisia, a crise sanitaria afecta á provisión dunha unidade de control electrónica que levan os coches fabricados en Vigo. O país asiático, que está a alcanzar cifras marca de contaxios diarios de Covid, decretou un peche case total e ten severas restricións que afectan o transporte e a outros sectores.
Estas xornadas de “non actividade” xestionaranse con arranxo aos mecanismos de flexibilidade establecidos. Así mesmo, espérase retomar a actividade o 30 de agosto, aínda que a empresa puxo a disposición do persoal o teléfono 900.717.273 para dar información actualizada aos traballadores sobre cando volverán á fábrica.
A dirección de Stellantis Vigo informou de que a “célula de crise” do grupo e os equipos do propio centro vigués traballan para “minimizar o impacto” desta situación, e pediron “comprensión” e “colaboración”.
As paradas na produción da fábrica foron constantes nos últimos meses, precisamente debido a eses problemas de subministración causados pola falta de semiconductores. De feito, a dirección e a maioría do comité de persoal pactaron a aplicación dun ERTE para paliar as consecuencias desas suspensións de actividade.
40 anos despois, Rompente escenifica a súa volta co libro “Que hostia din os rumorosos?”
O grupo de comunicación poética “Rompente”, integrado por Antón Reixa, Manuel Romón e Alberto Avendaño, escenificou este venres en Vigo o seu regreso, máis de 40 anos despois, coa presentación do libro ‘Que hostia din vos rumorosos?’, editado por Elvira.
Trátase dun volume de poesía ilustrado por Menchu Lamas, Antón Patiño e Rubén Romeu, con pezas inéditas na súa maioría, e estruturado en catro partes: Derrotas (Manuel Romón), Carallo29! (Alberto Avendaño), Room Service (Antón Reixa) e Rompentres (textos conxuntos do tres).
Antón Reixa puxo en valor a colaboración dos artistas Menchu Lamas e Antón Patiño, que quixeron “sumarse a esta mafia artística viguesa”, e tamén a participación de Julián Hernández, “histórico Siniestro Total”, que escribiu un prólogo que “resultou ser o texto máis vangardista”.
Reixa anunciou que, ademais da presentación do libro por toda Galicia, Rompente protagonizará no outono, con apoio do Xacobeo 21-22, unha xira de 8 recitais noutras tantas localidades da comunidade. “Aí aparecerá a polifonía poética, os tres recitando os textos (…) e con soporte de vídeo e son”, explicou, á vez que agradeceu a “complicidade” da editorial Elvira, “a editorial de Carlos Oroza”, nun momento “esplendoroso” da poesía en Galicia.
Pola súa banda, Manuel Romón sinalou que este libro “é como unha biblia, un libro de libros”, mentres que Alberto Avendaño subliñou que o volume supón a continuación dun diálogo iniciado a finais dos 70 entre este “tres tristes tigres” e Lamas e Patiño.
“COLLAGE” DE IMAXES
O pintor e escritor Antón Patiño explicou a súa colaboración neste libro como unha plasmación dun ‘collage’ de imaxes, da mesma maneira que é un ‘collage’ o grupo Rompente. “Queriamos que tivese a mesma característica: mesturar distintos ingredientes e que se produza, por precipitado químico ou alquímico, unha explosición como é Rompente”, engadiu.
Menchu Lamas, mentres, explicou o proceso de traballo nos últimos meses para ilustrar este volume, e valorou que han traballo “con total liberdade”. “Só había unha premisa que había que cumprir: que o texto poida lerse”, indicou.
Finalmente, o editor Xabier Romeu apuntou que este proxecto foi “todo un reto, que daba un pouco de vertixe”, pero expresou a súa satisfacción polo resultado. Así mesmo, recalcou que recuperar a actividade de Rompente é “facer moito máis que un libro” e valorou que a editorial Elvira foi “privilexiada” por poder traballar con Reixa, Romón, Avendaño, Lamas e Patiño.
Cifrados en 8 millóns os danos pola explosión de Tui segundo o xulgado que determina a imputación do dono da pirotecnia
O Xulgado de Instrución número 1 de Tuicifrou en case 8 millóns de euros o custo dos danos pola explosión que tivo lugar nun almacén da localidade en 2018 e determinou a imputación do propietario da pirotecnia La Gallega e único investigado ata o momento, Francisco G.L., tras concluír as dilixencias previas.
Segundo detallaron fontes xudiciais, o auto reflicte que os feitos que se investiga poden constituír dous delitos de homicidio imprudente, delitos de lesións imprudentes, delitos de risco catastrófico na súa modalidade de delitos de risco provocados por explosivos e outros axentes e delitos de danos imprudentes.
Así mesmo, estima que os danos materiais causados en vivendas xeraron un custo de reposición bruto total de case de 7,88 millóns de euros. Así, o custo da afectación de mobiliario e aveños elevouse a máis de 436.466 euros, mentres o dos danos en servizos cifrouse en máis de 648.366 euros.
O auto tamén detalla que o número total de prexudicados na causa ascende a 691 e que 90 permanecen pendentes de ofrecemento de accións. Ademais, apunta que, das dilixencias policiais practicadas, despréndese que Francisco G.L. ocultou ás inspeccións da Intervención de Armas e Explosivos da Garda Civil e a área de Industria e Enerxía da Subdelegación de Goberno de Pontevedra máis de 1.400 quilos de produtos con carga explosiva con destino descoñecido.
Desta cantidade, case 736 quilos procedían de provedores españois e, máis de 671, de Portugal. Así, sinálase que estes produtos, fóra de control da Administración, presumiblemente depositáronse na nave que estourou en Tui.
RELATO DOS FEITOS
A xuíza lembra que os feitos tiveron lugar o 23 de maio de 2018 sobre as 16,15 horas, cando se produciu unha explosión nun almacén situado na zona de Paramos que volatilizou o almacén onde se orixinou. Tamén sinala que produciu a práctica destrución de todas as edificacións da súa contorna das que a maior parte eran vivendas unifamiliares.
Neste sentido, sinálase que o investigado utilizaba o almacén estourado para fins particulares sen ningún tipo de licenza administrativa de actividade e sen cumprir as normas de seguridade en canto a almacenamento e custodia de materiais explosivos e pirotécnicos.
Así, enumérase que se trataba de 1.000 quilos de nitrato potásico, 150 ou 200 quilos de xofre e 200 litros de hidrocarburos, ademais de oito ou dez caixas de mecha de yesquero, varas, cilindros de cartón e outros efectos utilizados para a actividade da pirotecnia.
Nesta liña, a xuíza incide en que o lugar no que se produciu a explosión carecía de autorización administrativa para o depósito, a fabricación ou a venda de artigos pirotécnicos, polo que se trataría dun depósito ou taller de pirotecnia ilegal carente de autorización gubernativa preceptiva.
Tamén detalla que a explosión levou o falecemento de dúas persoas, múltiples lesionados e innumerables danos materiais. Así, considéranse graves danos en inmobles situados nun radio de 200 metros desde o foco da explosión, que se sinala que provocou a inhabitabilidade e inutilidade dos locais e construcións sobre os que actuou, e onde os primeiros 30 metros considéranse de destrución total.
DESCUBRIMENTO DE MÁIS PRODUTOS
Adicionalmente, o auto apunta que o 26 de maio de 2018, tres días despois do suceso, descubriuse un alpendre onde o investigado almacenaba tres bidóns de cartón contendo diferentes tipos de artefactos pirotécnicos xa terminados e listos para ser utilizados.
En concreto, remarca que contiñan 90 quilos de pólvora pirotécnica e 474 quilos de sustancia pulverulenta de cor gris, aparentemente pólvora pirotécnica a granel, e indica que, mediante o informe da Unidade Especializada dos TEDAX, “conclúese que se trata de materiais pirotécnicos terminados”.
A xuíza explica que o 27 de maio de 2018 localizouse material explosivo noutro galpón situado no barrio Igrexa-Baldranes. Así, descubriuse que o investigado almancenaba produtos pirotécnicos terminados na parte posterior á localización da empresa La Gallega.
Francisco G.L entrou en prisión días despois da explosión, segundo decretou o Xulgado de Instrución número 1 de Tui. Posteriormente, en marzo de 2019, a xuíza asinou un auto polo que quedou en liberdade provisional.
A Xunta responsabiliza a BNG e PSdeG dos “erros” no inicio do curso por apoiar ao Goberno Central
A Consellería de Cultura, Educación e Universidade reforzará nos próximos días os servizos de limpeza e de comedor nos centros educativos con recursos e persoal, en concreto os de secundaria e todos aqueles que dependan directamente da administración autonómica.
Esta decisión tomouse tras as reiteradas críticas e demandas desde as administracións municipais e das propias direccións dos centros, que denunciaron falta de medios e de persoal para poder executar as medidas necesarias e esixidas para cumprir cos protocolos sanitarios pola COVID-19.
No caso do comedor, vanse a dotar de prazas tanto naqueles de xestión directa como de indirecta e elaborarase un documento que permita abrir estes espazos á incorporación de colaboradores e coidadores, ata agora acoutados persoas de grao directo vinculado á comunidade educativa. O conselleiro do ramo, Román Rodríguez, anunciou este reforzo en sede parlamentaria tras ser interpelado polos grupos da oposición respecto dos problemas do inicio do curso e en relación aos protocolos sanitarios.
Unha intervención na que Rodríguez recoñeceu “erros”, pero na que insistiu no argumentario defendido nas últimas xornadas: a maioría dos problemas que se produciron durante o inicio do curso debéronse ao cambio de criterio do Goberno central respecto das medidas de seguridade, en particular ao metro e medio de distancia entre alumnos na aula.
“A situación é clarísima”, insistiu Rodríguez, quen acusou aos grupos da oposición de non recoñecer “nada” e a dedicarse, como ‘Sísifo’, a “subir a roca e volver atrás”, ao centrar as súas críticas “nas consecuencias e non nas causas” das dificultades rexistradas nos institutos para reorganizar os espazos e horarios debido a esas novas medidas.
RESPONSABILIDADE DA OPOSICIÓN
Neste sentido, advertiu a socialistas e nacionalistas que tamén teñen a súa “responsabilidade” nesa “clave de bóveda” que derivou nos problemas de adaptación dos centros, polo seu apoio ao Executivo de Pedro Sánchez no Congreso, e a reprochado que utilicen “a anécdota” e problemas puntuais para “cuestionar o impecable traballo” dos expertos sanitarios respecto ao sistema educativo.
O inicio do curso volveu a protagonizar o debate no pleno autonómico con motivo de dúas interpelacións presentadas polo PSdeG e o BNG, centradas na situación durante o regreso ás aulas e os protocolos aprobados polo Goberno galego. O conselleiro sacou peito dos pasos dados pola Xunta e do funcionamento das medidas, e mesmo asegurou que o resto de territorios “copiaron” parte das accións implantadas polo Goberno galego, como o uso de máscara a partir de seis anos ou a ventilación de espazos.
“O DETONANTE DO CAOS”
Manuel Lourenzo, do BNG, contrapuxo a actitude dunha comunidade educativa “á vangarda na loita contra a COVID” fronte unha Xunta “que non estivo á altura” e que estivo “máis preocupada” pola “propaganda” que por escoitar aos sectores implicados na educación.
Lourenzo advertiu de que “o detonante do caos” que viven os centros foi a negativa da fixar o metro e medio de separación xa nas súas instrucións do mes de xullo, na liña das recomendacións do Ministerio e da OMS. O deputado nacionalista sinalou que esta situación suscitou “un debate” no propio seo da Consellería que terminou cun cesamento “fulminante das voces discordantes” do equipo entón dirixido por Carmen Pomar.
Pola súa banda, o socialista Luís Álvarez lembrou que foron os protocolos da Xunta de xullo e principios de agosto os que suscitaron as “protestas de todos os sectores”, e que levaron a diversos equipos directivos a presentar a súa dimisión.
Álvarez insistiu en que é a Xunta a que debe “favorecer ese diálogo” coa comunidade educativa, para que os protocolos contemplen unha previsión sobre os diversos escenarios e para favorecer “a máxima conciliación”.
Abascal: “Estas eleccións son unha oportunidade histórica para manter a Feijóo vixiado”
O presidente de VOX, Santiago Abascal, proclamou este xoves que o seu partido terá “vixiado” ao presidente da Xunta e candidato á reelección, Alberto Núñez Feijóo, e sinalou que, se é chave de goberno, “negociará”, pero sen “garantir” un eventual apoio á investidura do líder do PP.
Así o trasladou nun acto de presentación das catro cabezas de lista da formación que concorren ás eleccións galegas do 12 de xullo, celebrado nunha nave industrial dun polígono en Mos, ante a que se congregaron varios mozos e mozas con bandeiras e pancartas antifascistas, ao berro de “Reaccionarios e fascistas, fóra de Galicia!”..
Abascal subliñou que os próximos comicios autonómicos son “unha oportunidade histórica para manter a Feijóo vixiado” e, aínda que recoñeceu a dificultade de “gañar”, incidiu en que VOX aspira a obter “un gran resultado”, unha “presenza suficiente e significativa” para ter ao líder do PP galego “vixiado” e “que non estea constantemente mirando ás políticas nacionalistas e esquerdistas”.
O presidente de VOX avanzou algunhas das propostas do seu partido para a Comunidade galega: implantación do chamado ‘pin parental’, o cheque escolar e a liberdade de escolarización “en español ou galego”, que o presidente Feijóo “nega” aos pais; medidas de apoio á familia e á conciliación; axudas ao sector primario e para fixar poboación no rural; ou acabar “coas leis ideolóxicas”.
Segundo Abascal, Galicia sofre os mesmos problemas que Cataluña “hai 10 ou 20 anos” polas “continuas cesións de Feijóo aos nacionalistas” e a estratexia do presidente galego “é a mesma que a de Rajoy: deixar facer e deixar pasar o tempo a ver se se cansan”. “Xa vimos onde nos levaron en Cataluña, onde parece inexorable a desaparición do Estado”, alertou.
“Dicímoslles aos galegos que, fronte ás tentacións nacionalistas, hai unha alternativa, de unidade, de defensa dos traballadores, de defensa da liberdade educativa, dunha inmigración controlada e asumible (…), e Galicia será ‘verde’ máis pronto que tarde”, proclamou.
POSIBLE APOIO A FEIJÓO
Cuestionado polos medios acerca dun posible apoio á investidura de Feijóo se VOX obtén parlamentarios en Galicia, Santiago Abascal (que hai unhas semanas se mostraba disposto a un acordo co PP para evitar un goberno de “extrema esquerda” na Xunta) advertiu de que o seu partido “non garante nada” a ese respecto. “Se os galegos nos dan a chave do próximo goberno, faremos valer a nosa representación, de maneira tépeda (…) VOX negociará”, aseverou.
INGRESO MÍNIMO VITAL
O presidente de VOX insistiu en que o Ingreso Mínimo Vital, validado polo Congreso nas últimas horas (coa abstención do seu partido) é “insustentable” para as contas públicas, provocará un “efecto chamada” e levará o Estado “á pobreza” e “ás cartillas de racionamento”.
Preguntado polos medios acerca da posición de VOX no Congreso, Abascal xustificou a abstención porque a súa formación, lembrou, propuxera como alternativa unha axuda “temporal”, que si sería “positiva”.
Con todo, insistiu, o Ingreso Mínimo Vital ten carácter permanente e non é máis que “unha medida que pretende a compra masiva de votos“. Ao seu xuízo, esta renda é “insustentable” e “vai producir un brutal efecto chamada”. “Xa hai decenas de webs no Magreb animando a vir, porque lles dixeron que poden cobrar”, denunciou.
INVESTIGACIÓN REI EMÉRITO
Doutra banda, Abascal tachou de “cortina de fume da esquerda” a proposta de crear unha comisión de investigación sobre as actividades diplomáticas e comerciais do Rei Emérito en Arabia Saudita, e lembrou que “son os tribunais os que teñen que investigar a cidadáns que, neste momento, non teñen función política nin constitucional”.
Segundo subliñou, “o que ten que explicar o Goberno” é “por que Pujol está libre”, “por que Torra non foi destituído” ou “por que non se entregou a Puigdemont”. “Eles non o van explicar, fareino eu: porque son os cómplices da investidura do señor Sánchez”, sentenciou.
Dous feridos nun accidente nunha concentración moteira de Nigrán
Dúas persoas resultaron feridas na tarde deste luns tras producirse un accidente entre dúas motos na localidade pontevedresa de Nigrán durante o transcurso dunha concentración moteira.
Así, segundo informou o 112 Galicia, foi minutos antes das 18,00 horas cando o propio 061 alertou ao Centro Integrado de Atención ás Emerxencias do suceso, polo que os xestores de emerxencias informaron á Policía Local, ao GES do Val Miñor e aos voluntarios da Garda Civil.
Tal como indicaron fontes da Policía Local, os feitos ocorreron na parroquia Panxón, nunha zona próxima á igrexa. O accidente produciuse cando dúas motocicletas chocaron entre elas nunha saída, o que produciu a caída de ambos os pilotos.
Tras o choque, ambos os condutores resultaron feridos, polo que tiveron que ser trasladados ao hospital Povisa de Vigo. Segundo as mesmas fontes, non foron feridos graves, pero si presentaban problemas na clavícula.
Ciudadanos lamenta a actitude “temeraria” do alcalde ao non atender os bombeiros de Vigo
Ciudadanos criticou este luns a actitude “absolutamente temeraria” do alcalde de Vigo, Abel Caballero, por non reunirse co colectivo de bombeiros da cidade (en folga desde mediados de agosto por falta de persoal) e escoitar as súas reivindicacións e propostas para mellorar o servizo.
Así o trasladou a candidata ao Congreso pola provincia de Pontevedra, Beatriz Piñeiro, tras manter unha reunión con representantes de bombeiros de Vigo. “Denunciamos a actitude absolutamente temeraria do alcalde ante unha situación que non quere afrontar e non quere resolver”, sinalou.
A candidata fixo alusión ao decreto do goberno local que suspende os descansos dos bombeiros e impón facer horas extras para paliar a falta de efectivos, un decreto “que non era legal”, á luz de dúas sentenzas recentes dun xulgado vigués que o anularon.
Segundo incidiu Beatriz Piñeiro, o que pretenden os bombeiros é “poder dar un servizo de calidade”, e o rexedor “nin sequera quere recibilos”, a pesar de que se trata dun departamento “básico” para a seguridade dos cidadáns.
Por iso, instou ao goberno de Abel Caballero a non recorrer a sentenza que anularon o decreto e a reunirse cos bombeiros para escoitar as súas demandas.
Caballero anuncia que o estudo sobre o abastecemento de auga está “desbloqueado”
O alcalde de Vigo, Abel Caballero, avanzou que o estudo que permitirá alcanzar unha “solución” para o abastecemento de auga da área de Vigo está “desbloqueado”.
Nunha rolda de prensa celebrada en Vigo, o rexedor recalcou que a pluviosidade nas zonas de recollida de auga é “suficiente” para abastecer a cidade olívica e apuntou que o problema se atopa no seu almacenamento. Así, detallou que este mércores se puxo en contacto co secretario de Estado de Medio Ambiente, Hugo Morán, responsable da licitación do estudo.
Precisamente esta semana a conselleira de Infraestruturas e Mobilidade, Ethel Vázquez, lembrou que a Xunta e o Concello esperan desde hai meses os informes necesarios para asinar o convenio de colaboración co Ministerio de Transición Ecolóxica que permita realizar o estudo correspondente.
Mentres, o alcalde acusou a Administración autonómica de non actuar neste sentido “durante seis anos” a pesar de que, segundo asegurou, o municipio da urbe galega expúxolle a importancia de que se garantise “un transvasamento de emerxencia” do que poder dispor en caso de necesidade. Nesta liña, chamou á Xunta a non “pór problemas” ao desenvolvemento do proxecto.
Así mesmo, puxo en valor que o Goberno central asumise o “compromiso” da realización do estudo e que este se vaia a levar a cabo a pesar de que non se puideron aprobar os Orzamentos Xerais do Estado (PGE).
HOXE EN GALICIA
