Tres voos que tiñan previsto aterrar no aeroporto de Peinador, en Vigo, foron desviados ao longo da xornada debido ás condicións meteorolóxicas adversas, segundo confirmaron fontes de Aena a Europa Press. En concreto, un voo de Air Europa que cubría a ruta Madrid–Vigo tivo que regresar ao aeroporto de Barajas, mentres que outro voo de Binter, con orixe en Gran Canaria e destino Vigo, foi desviado ao aeroporto da Coruña. Así mesmo, un terceiro avión de Iberia, tamén procedente de Madrid, viuse obrigado a volver á capital estatal sen poder completar a aterraxe en Peinador.
Temporal.- Vigo volve quedar sen tren por segundo día consecutivo
Renfe informou de que este venres se manterá a suspensión de trens con orixe e destino Vigo e amplíase á ruta entre Ourense, O Carballiño e Santiago, ante risco de inundacións e desprendementos de terra debido ao temporal.
Desta forma, os traxectos afectados –alta velocidade, media e longa distancia– son os que conectan Vigo Urzaiz con Santiago; Vigo Guixar e a capital galega; Vigo Guizar e Tui; Vigo Guixar e Ourense; así como, Ourense-Carballiño-Santiago. Renfe non establecerá un plan de transporte alternativo por estrada, pero indicou que están habilitados os cambios e anulacións de maneira gratuíta.
O Concello de Vigo, pola súa banda, enviou un comunicado na tarde deste xoves para informar de que reclamou a Renfe un servizo alternativo de buses “dado que a rede ferroviaria non está en condicións de operatividade”. “Renfe debe pór a disposición dos seus viaxeiros autobuses que circulen desde a estación de buses de Vigo até Santiago, coas mesmas frecuencias que o tren, e con capacidade suficiente para o traslado de todos os usuarios. “Renfe non pode deixar desatendidos e sen servizo de transportes aos viaxeiros e viaxeiras de Vigo”, reza o comunicado municipal.
STALLANTIS PARALIZADA
TAmén a produción da planta viguesa de Stellantis volveu a verse afectada pola falta de subministracións debido ao temporal, e este venres cancelou gran parte da súa actividade. Así, a empresa comunicou aos traballadores que, debido a “causas de forza maior”, derivadas das malas condicións meteorolóxicas, o fluxo de aprovisionamentos viuse impactado e suspéndense varias quendas de traballo.
SOGAMA REFORZA O TRANSPORTE POR ESTRADA ANTE O BLOQUEO DO TREN
A suspensión da circulación ferroviaria en Vigo polo temporal obrigou a Sogama a reorganizar de urxencia a xestión de residuos para evitar o colapso nas plantas de transferencia do sur de Galicia. Con 70 colectores paralizados na vía férrea —o que supón unhas 1.400 toneladas de lixo bloqueadas—, a empresa pública tivo que activar un plan de continxencia por estrada, xa que a terminal de Vigo-Guixar canaliza o 60% do lixo que a entidade transporta por tren.
Para garantir o servizo antes da fin de semana, Sogama reforzou o transporte con 19 camións plataforma e ampliou os horarios e medios humanos nas plantas de Pontevedra, as máis afectadas polas descargas erradas en Vigo, O Porriño, O Rosal, Arbo e A Lama. A compañía tamén coordina coas empresas de recollida municipal para axilizar o baleirado de colectores e minimizar as retencións en Cerceda.
Caballero acusa á RFEF e ao PP de vetar a Vigo como sede do Mundial 2030
O alcalde de Vigo, Abel Caballero, reiterou este martes as súas acusacións contra o presidente da Real Federación Española de Fútbol, Rafael Louzán, e contra o PP, aos que responsabiliza de opoñerse a que Vigo sexa unha das sedes do Mundial de fútbol de 2030. Ademais, avanzou que xa solicitou unha entrevista coa nova ministra de Educación, Formación Profesional e Deportes para informarlle directamente desta situación.
En declaracións remitidas aos medios, o rexedor olívico volveu cargar contra a Xunta de Galicia, a través da súa delegada territorial en Vigo, Ana Ortiz —á que cualificou como “subdelegada” e “cargo político menor”—, acusándoa de soster “mentiras” sobre o proxecto de ampliación de Balaídos e sobre o cofinanciamento das obras. Segundo Caballero, o goberno autonómico coñece “todo” o relacionado coa candidatura de Vigo, pero “non quixo asinar a solicitude” para ser sede do Mundial e negouse a participar no financiamento da parte que lle correspondería das obras no estadio municipal.
CRÍTICAS Á RFEF E Á EXCLUSIÓN DE VIGO
O alcalde volveu censurar que a RFEF non propuxese a Vigo como sede, mesmo tras a renuncia de Málaga, o que, segundo denunciou, provocou que España conte con 11 sedes concedidas pero só se enviasen 10 candidaturas.
“Porque non quixo enviar o nome de Vigo, porque Rueda dille a Louzán que non envíe o de Vigo, que Vigo non pode ser de ningún modo sede do Mundial”, afirmou. Así mesmo, insistiu en que esta postura explicaría a negativa da Xunta a contribuír economicamente ás obras de Balaídos, a pesar de que, segundo recalcou, se trata da “icona deportiva máis importante que hai en Galicia”, sexa ou non sede mundialista. “Queren que sexa A Coruña, e se non é A Coruña, ningunha en Galicia”, subliñou, antes de asegurar que Louzán, a Xunta e o PP están “confabulados contra Vigo”.
“IMOS PELEXAR A FONDO”
“Pois imos pelexar a fondo”, advertiu Caballero, quen confirmou que solicitou unha reunión coa ministra Milagros Tolón e tamén co Consello Superior de Deportes, “para falar do Mundial”. Neste sentido, deixou claro que non renunciará “de ningún modo” a descubrir “as trampas e o aconchabamento” que, ao seu xuízo, manteñen PP, Louzán, Alfonso Rueda e a Deputación de Pontevedra contra a cidade. “Non me vou quedar calado. Voullo contar ao Goberno de España, á ministra de Deportes e ao presidente do Consello Superior de Deportes. Vou levar a voz de Vigo a todas partes”, sentenciou.
O padroado do Ifevi aproba o prego para deseñar o seu futuro plan estratéxico
O padroado do Instituto Feiral de Vigo (Ifevi) aprobou este xoves por unanimidade, nunha reunión presidida polo conselleiro José González, o prego técnico para a contratación da asistencia técnica que elaborará os plans funcional e estratéxico do recinto. Proximamente, lanzarase a licitación co fin de deseñar no menor prazo posible estas ferramentas “clave para orientar o desenvolvemento futuro do complexo, con criterios de planificación, eficiencia e visión a longo prazo”.
A reunión tivo lugar tras os encontros celebrados no marco do grupo de traballo creado para potenciar o Ifevi, no que se puxeron en común as principais necesidades e liñas de actuación. Entre estas prioridades inclúense as melloras operativas, cuestións críticas relacionadas cos accesos e o aparcadoiro, así como a reordenación de espazos. A Xunta subliñou que “a tarefa principal é avanzar con axilidade e rigor técnico para que o Ifevi poida dispor canto antes dunha folla de ruta sólida en beneficio de Vigo e da súa área de influencia”.
No devandito grupo de traballo participan representantes da propia Xunta, o Concello de Vigo, a Deputación de Pontevedra, a Confederación de Empresarios de Pontevedra, a Cámara de Comercio, a Mancomunidade de Vigo, a Zona Franca, e feiras de referencia como Conxemar, Navalia e o Salón do Automóbil.
NOVA VALORACIÓN DO RECINTO
Na xuntanza tamén se abordou o proceso de elaboración dunha nova valoración homologada do recinto, que xa está en marcha baixo a premisa de que este estudo “non supoña frear nin atrasar os traballos que xa están en marcha”. Trátase dunha tarefa que avanza en paralelo ao grupo de traballo co obxectivo de “reforzar a transparencia e a confianza institucional”.
Este acordo, segundo indicou o goberno autonómico, é un reflexo da “man tendida” ao Concello de Vigo e á Zona Franca. A Xunta reafirmou así a súa aposta pola implantación dun modelo de gobernanza baseado nun sistema tripartito de toma de decisións por unanimidade entre as tres entidades para garantir a estabilidade do complexo feiral.
Vigo convértese en epicentro da oncoloxía de precisión con máis de 40 expertos de toda España
A cidade de Vigo acollerá este mes o VIII Simposio Nacional de Oncoloxía de Precisión, un foro que reunirá a especialistas de toda España para analizar os últimos avances clínicos e de xestión neste ámbito clave da medicina personalizada. Nesta edición, o encontro poñerá o foco na implementación das unidades de ensaios clínicos de fases I, espazos concibidos para integrar investigación e asistencia sanitaria, facilitar o acceso temperán a terapias innovadoras e garantir a seguridade e calidade dos tratamentos.
O simposio celebrarase os días 19 e 20 de febreiro na sede de Afundación en Vigo, baixo a coordinación científica dos doutores Sergio Vázquez Estévez, xefe do Servizo de Oncoloxía Médica do Hospital Universitario Lucus Augusti (Lugo), e Martín Emilio Lázaro Quintela, xefe do Servizo de Oncoloxía Médica do Complexo Hospitalario Universitario de Vigo. Segundo informa a organización, o encontro contará con máis de 40 expertos como relatores e moderadores e suma xa máis de 150 profesionais inscritos. “O simposio destaca polo seu enfoque transversal, conectando especialistas de distintas áreas oncolóxicas con representantes da industria farmacéutica e da Administración”, sinalan. O foro está organizado pola Fundación Galega de Investigación Biomédica Galicia Sur.
ENSAIOS CLÍNICOS E ACCESO TEMPERÁN A TERAPIAS INNOVADORAS
Un dos eixos centrais será a mesa dedicada á implantación de unidades de ensaios clínicos de fases I. Segundo explica o doutor Martín Lázaro, o obxectivo é compartir experiencias, identificar barreiras organizativas e definir modelos eficaces que permitan integrar investigación e asistencia, garantindo tanto a seguridade dos pacientes como o acceso a tratamentos innovadores. Pola súa banda, o doutor Sergio Vázquez subliña que o carácter transversal do foro permitirá reunir a especialistas de distintas áreas tumorais, “identificar puntos de encontro, aprender uns doutros” e avanzar cara a unha oncoloxía de precisión máis coordinada e equitativa.
XENÓMICA, INTELIXENCIA ARTIFICIAL E APOIO Á INVESTIGACIÓN NOVA
O programa inclúe tamén temas considerados crave no presente e futuro da especialidade, como a incorporación da secuenciación xenética desde o diagnóstico inicial do cancro, o uso da intelixencia artificial e a bioinformática como apoio á decisión clínica e á xestión das toxicidades, un desafío crecente nas terapias dirixidas. Durante o simposio celebrarase ademais a sétima edición das Bolsas Javier Casteláns, destinadas a recoñecer e apoiar proxectos de investigación de novos oncólogos. Como destaca o doutor Lázaro, “investir en mozos investigadores é investir no futuro do sistema sanitario e en mellores opcións para os pacientes”.
Protesta pola sanción a unha traballadora que alertou dunha mala praxe nunha escola infantil
Decenas de persoas concentráronse na mañá deste xoves en Vigo tras a sanción a unha empregada dunha escola infantil pública da Xunta de Galicia por informar a unha nai dunha presunta mala praxe levada a cabo, supostamente, por unha educadora do centro. A protesta levou a cabo ante as instalacións da Escola Infantil Rosalía de Castro, situada no barrio de Coia, despois de que o Goberno galego abrise expediente a unha traballadora do centro por avisar á nai dunha alumna sobre un suposto caso de acoso ocorrido en marzo do ano pasado.
Segundo relatou a propia amoestada, Eva Pallas, ela decatouse do sucedido a través doutra traballadora, que lle contou que vira un caso de mala praxe dunha educadora cara a unha nena. Á saída do centro, a nai da alumna presuntamente acosada preguntoulle directamente se ocorrera algo ao notar á filla nerviosa. Por iso, ela contoulle o que sabía e avisaron tamén á directora do centro. En concreto, tal como explicou o secretario xeral do sindicato CUT, Ricardo Castro, unha das educadoras encerraría á nena no baño para tratar de que deixase de chorar.
Tiveron que pasar varios meses ata que a traballadora recibiu unha notificación de apertura de expediente sancionador por contar á nai o ocorrido. En principio, acusábaselle de non cumprir o protocolo, pero ao decatarse de que este non existía, a sanción xustificouse por saltarse o deber de confidencialidade. Tanto a afectada como o sindicato consideran que é deber do empregado público informar ás familias se se é preguntado directamente e cualifican a situación como unha “clara práctica de coacción”.
Finalmente, a sanción quedou nunha amoestación leve por escrito, pero os manifestantes solicitaron á Xunta a revogación da mesma e a creación de protocolos de actuación claros ante situacións similares. Polo momento, descoñécese se a educadora implicada nos feitos, que xa non traballa no centro, sufriu algunha represalia pola súa conduta cara á menor.
A CIG denuncia que o modelo de Muface prioriza o beneficio económico sobre o dereito á saúde
A CIG denunciou este luns que o modelo de mutualismo administrativo está deseñado para pór “obstáculos administrativos nos procesos complexos e custosos” mentres as entidades privadas se centran nos casos máis rendibles. A central nacionalista basea esta crítica na recente sentenza do Tribunal Superior de Xustiza de Madrid, que deu a razón a finais de outubro a un mutualista ao que Muface lle denegara a asistencia nunha intervención oncolóxica en Vigo. O tribunal recoñeceu o dereito do paciente a que a Administración lle abone os 31.100 euros que tivo que custear polo seu tratamento.
Segundo a CIG, este caso é unha proba clara de como funciona o sistema de sanidade concertada, que “traslada o risco económico aos pacientes cando o tratamento resulta caro”. O sindicato afirma que Muface actuou como unha “correa de transmisión dos intereses da aseguradora”, negándose a asumir o custo da operación co único obxectivo de aforrar gastos. Para a central, esta resolución deixa en evidencia as carencias estruturais dun modelo baseado na externalización cara a entidades privadas cuxo fin principal non é a garantía de dereitos, senón a maximización de beneficios.
CISTECTOMÍA RADICAL CON ROBÓTICA
O procedemento obxecto do conflito foi unha cistectomía radical realizada con cirurxía robótica, unha técnica complexa e custosa. A CIG denuncia que Muface avalou unha interpretación “restritiva e interesada” do concerto sanitario para evitar o pago. O fallo xudicial, segundo subliña o sindicato, desmonta o argumento habitual das aseguradoras privadas de cubrir unicamente o que aparece listado de xeito literal nos concertos, ignorando que moitas destas técnicas xa están plenamente implantadas e normalizadas no sistema público de saúde.
A resolución xudicial foi promovida no marco dunha acción sindical impulsada pola propia CIG para defender os dereitos dos mutualistas ante o que consideran prácticas abusivas. O sindicato nacionalista insiste en que o modelo actual pon en risco a saúde dos traballadores ao depender de criterios económicos e non clínicos, especialmente en patoloxías graves como o cancro, onde a rapidez e o acceso á mellor tecnoloxía dispoñible son vitais para a supervivencia do paciente.
Médicos e enfermeiras alertan do colapso da Atención Primaria en Vigo: “As listas de agarda chegan aos 15 días, diga o que diga a Xunta”
Traballadores de Atención Primaria concentráronse este xoves ante o centro da saúde da rúa Cuba, en Vigo, para denunciar a “situación crítica” deste servizo pola falta de persoal, unha situación que “se cronifica” e que empeora a calidade asistencial. Así o trasladou a presidenta da comisión de centro, Pilar Rodríguez (CIG), que puxo precisamente o exemplo do centro da rúa Cuba, onde faltan 7 facultativos, a maioría da quenda de tarde; ou do centro de saúde do Porriño, onde faltaron a pasada semana 6 profesionais.
“Desde a última OPE, en xaneiro, reduciuse aínda máis o persoal médico na área sanitaria, o que está a producir unha situación totalmente insustentable”, alertou, antes de denunciar a “sobrecarga” de traballo que padecen os profesionais e o empeoramento da calidade asistencial, con listas de agarda para que os usuarios sexan atendidos “de máis de 15 días, a pesar do que diga a Consellería”. Nese contexto, explicou Pilar Rodríguez, tampouco se está substituíndo ao persoal de Enfermaría e necesítanse tamén reforzos en servizos administrativos. Por iso, pediron á xerencia “primeiro, que escoiten aos profesionais”, e que cubran as categorías para as que si hai persoal.
SERGAS
Ante esta situación, a dirección da área Sanitaria de Vigo non tardou en respostar, reivindicando o seu “compromiso” coa mellora das condicións asistenciais e laborais na Atención Primaria. Así, puxo en valor o seu “gran esforzo organizativo” nun contexto de “déficit” de profesionais “derivado da ineficiente planificación estatal” dos recursos sanitarios e das limitacións existentes no acceso á profesión. Nun comunicado, o Servizo Galego de Saúde (Sergas) falou do caso concreto do centro de saúde da rúa Cuba de Vigo, onde na actualidade existen tres vacantes estruturais que están a ser cubertas mediante prolongacións de xornada.
Ademais, hai catro ausencias, maiormente por incapacidade temporal, que tamén se cobren con prolongacións de xornada nun 80 %. “A área Sanitaria continúa traballando para manter a actividade asistencial e minimizar o impacto destas situacións sobre a atención á cidadanía e sobre os profesionais”, insisten desde o Sergas, destacando o proceso de oferta pública de emprego aberto, “que permitirá consolidar prazas e mellorar a estabilidade” do persoal.
APOIO DO ALCALDE
Pola súa banda, o alcalde, Abel Caballero, trasladou o seu apoio ao persoal do centro de saúde da rúa Cuba, que “están a defender aos seus pacientes”, e denunciou a “saturación” da PAC, as agardas para Atención Primaria e outros problemas que “van empeorar”. Así, volveu insistir en que a atención será peor cando abra o novo CIS Olimpia Valencia, porque “van quitar médicos” e “pechar” o servizo de Pediatría dalgúns centros. “A Xunta de Galicia só pensa en Vigo para aforrar diñeiro e levarllo a outros sitios de Galicia”, reiterou.
La Reina del Flow encabezará o Galicia Fest 2026 cun concerto no Porto de Vigo
A vicepresidenta da Deputación de Pontevedra, Luisa Sánchez, anunciou este luns o primeiro cabeza de cartel da segunda edición do Galicia Fest, que se celebrará os días 26 e 27 de xuño e contará coa La Reina del Flow, o fenómeno musical e televisivo latinoamericano que triunfa en Netflix. Segundo informou o ente provincial, a actuación terá lugar no porto de Vigo o venres 26 de xuño e contará co elenco orixinal da serie, entre eles Carlos Torres, Jay Torres e María José Vargas, que interpretarán temas emblemáticos como Amor imposible, Reflexo ou Perdóame.
O concerto de Vigo forma parte da xira internacional da Raíña do Flow, que tamén fará parada na A Coruña o 27 de xuño, coincidindo coa segunda xornada do festival. “Para a Deputación de Pontevedra é un pracer volver impulsar a conexión entre o porto e a cidade cunha oferta musical e de lecer dinámica. Estou convencida de que serán dous días de celebración que, como o ano pasado, encherán o Porto de Transatlánticos de música e bo ambiente”, afirmou Luisa Sánchez, quen puxo en valor o patrocinio da Deputación e da Xunta de Galicia no evento. As entradas para o concerto do venres e os abonos para todo o festival sairán á venda este martes, 10 de febreiro, ás 12.00 horas, con prezos iniciais de 25 euros para a entrada diaria e 40 euros para o abono completo.
Rodman construirá tres novas patrulleiras para a Armada por 10,4 millóns
A Dirección de Xestión Económica da Xefatura de Apoio Loxístico da Armada do Ministerio de Defensa adxudicou á galega Rodman Polyships tres novas patrulleiras por un importe de 10,4 millóns de euros.
Segundo publica este xoves a Plataforma de Contratación do Sector Público, o obxectivo deste contrato é a adquisición de tres patrulleiros de vixilancia para a Armada, facer Rodman coa adxudicación ao ser “a oferta máis vantaxosa para a administración”.
Agora, a firma galega terá dous anos de prazo para executar o contrato desde a formalización do mesmo. Cabe lembrar que non é o primeiro contrato que se adxudica Rodman, xa que o ano pasado o estaleiro entregou varias patrulleiras para o servizo de vixilancia da Axencia Estatal de Administración Tributaria.
HOXE EN GALICIA
