Inicio Blog Páxina 2020

O goberno de Vigo irá aos tribunais ante a intención da Xunta de “expulsar” aos traballadores da presa de Eiras, que “é municipal”

E.P.
-
0
O goberno de Vigo irá aos tribunais ante a intención da Xunta de “expulsar” aos traballadores da presa de Eiras, que “é municipal”

A Xunta de Goberno do Concello de Vigo aprobou este venres a interposición dun recurso contencioso administrativo contra a resolución de Augas de Galicia que actualiza o organigrama e o cadro de persoal para a explotación e para o plan de emerxencia da presa de Eiras, ao considerar que trata de usurpar a titularidade desa infraestrutura hidráulica, e tendo en conta que a xestión e explotación da mesma faina a propia administración municipal.

Os servizos xurídicos do Concello consideran que a resolución de Augas de Galicia, que supón substituír aos actuais traballadores da presa (da concesionaria municipal Aqualia) por empregados da empresa Ain Active On, contratada pola Xunta, implica un intento de “expulsar ao Concello de Vigo da posesión que ostenta da presa de Eiras para os efectos da súa explotación, conservación e mantemento” e asumir, de feito, a explotación que vén facendo o Concello desde os anos 70.

Por todo iso, o goberno local aprobou interpor este recurso contra esa resolución, e lembrou que no seu día xa fixo o mesmo contra a contratación desa empresa (Ain Active On) para a explotación e mantemento do encoro. Así mesmo, reclamará aos xulgados que deixe sen efecto a resolución de modo cautelar.

O conflito sobre a titularidade da presa de Eiras, da que se abastece a cidade de Vigo e varios municipios da área, iniciouse en 2014, cando a Xunta reclamou ao Concello olívico o pago dun canon de regulación pola captación de auga do encoro, alegando que era a administración autonómica a que o explotaba.

O Concello opúxose a ese pago, uns 655.000 euros, e a súa posición foi avalada polo Tribunal Económico Administrativo de Facenda. A partir de aí, iniciáronse as negociacións coa Xunta para asinar un convenio no que o goberno galego pretendía que Vigo asumise a explotación, e a administración local quería que o acordo reflectise que xa estaba a facer esa explotación.

Esas negociacións non frutificaron, pero a Xunta, a finais de 2019, aprobou o expediente para contratar o servizo de explotación e mantemento da presa (adxudicado logo a Ain Active On). Esta decisión tamén foi recorrida ante os tribunais polo Concello olívico.

TRANSVASAMENTO DESDE O MIÑO

Nese sentido, Caballero referiuse a a reunión mantida nas últimas horas entre o presidente da Xunta, Alberto Núñez Feijóo, e a ministra para a Transición Ecolóxica, Teresa Ribera, na que o mandatario galego decantouse por facer un transvasamento desde o Miño para garantir ao abastecemento de auga a Vigo e ao sur da provincia de Pontevedra.

A ese respecto, o alcalde criticou que Feijóo se pronunciou cando aínda non se coñecen os resultados do informe encargado a unha consultoría (financiado polo Goberno, a Xunta e o propio Concello) sobre as posibles alternativas para ese abastecemento.

Xunta insta o Goberno a detallar a cota de visitas ás Illas Atlánticas

redacción
-
0
Xunta insta o Goberno a detallar a cota de visitas ás Illas Atlánticas

A conselleira de Medio Ambiente, Territorio e Vivenda, Ángeles Vázquez, reclamou que se concrete a cota de visitantes para o Parque Nacional das Illas Atlánticas que se establecerá cando entre en vigor a fase 1 do plan de ‘desescalada’ mediante un escrito remitido á ministra para a Transición Ecolóxica e o Reto Demográfico, Teresa Ribera.

Segundo lembrou a Consellería de Medio Ambiente, Territorio e Vivenda, o plan do Executivo central contempla a realización de visitas en grupos reducidos aos parques naturais desde a fase 1, así como a ampliación do número de turistas que poden acceder aos mesmos na fase 2.

Ante esta situación, a titular autonómica da carteira de Medio Ambiente solicitou que se detallen as previsións do número de visitantes que se permitirán en cada fase para organizar con antelación o operativo de control e acceso ás illas.

Tras a entrada en vigor do estado de alarma que prohibiu o acceso aos parques naturais, a Xunta desactivou o sistema de autorizacións para acceder ao Parque Nacional das Illas Atlánticas. Así, cando se permitan as visitas de novo, a Xunta deberá volver activar esa aplicación co número de prazas que se poidan ofertar e organizar o servizo de acceso e as condicións de atracada nos portos coas navieiras.

Neste sentido, Ángeles Vázquez afirmou que contar con esa información con antelación facilitará o deseño do acceso a estas illas “con todas as condicións e garantías necesarias para manter o equilibrio entre o regreso a estes espazos naturais únicos e a súa conservación”.

O xuízo contra o acusado de violar a unha muller en Bueu suspendido por un posible caso de covid

E.P.
-
0
O xuízo contra o acusado de violar a unha muller en Bueu suspendido por un posible caso de covid

A Sección Segunda da Audiencia Provincial de Pontevedra suspendeu o xuízo previsto para este martes a un veciño de Bueu e residente en Marín acusado de violar, agredir e roubar a unha muller de 75 de anos tras entrar na súa vivenda.

O tribunal decidiu a suspensión da vista despois de que un dos avogados avisase á primeira hora da mañá de que tiña algo de febre. Esta circunstancia activou os protocolos de seguridade ante un posible caso de coronavirus e inmediatamente avisouse ao resto das partes.

O acusado fora conducido ata a Audiencia de Pontevedra desde a prisión da Lama, onde se atopa ingresado desde o momento da súa detención en novembro de 2017. Así, o xuízo volveu a quedar sinalado para os días 9, 10 e 11 de marzo.

A Fiscalía pide que este home sexa condenado a 15 anos de cárcere por agresión sexual, dúas por un delito de lesións e catro por un delito de roubo con violencia. Tamén reclama unha indemnización superior aos 8.000 euros polas lesións causadas e as secuelas psicofísicas que provocou na vítima, ademais da devolución dos 1.250 euros que roubou.

MARZO DE 2017

Segundo recolle o escrito de acusación do Ministerio Público, os feitos que se van a xulgar na Sección Segunda da Audiencia Provincial tiveron lugar na madrugada do 3 ao 4 de marzo de 2017 na vivenda da muller, na localidade pontevedresa de Bueu.

O relato da Fiscalía apunta que o acusado, tras fracturar os cristais e os barrotes da porta traseira da vivenda da vítima, subiu polas escaleiras e entrou na habitación na que esta durmía. A muller, que vivía soa no domicilio, viuse sorprendida polo seu asaltante, que vestía roupa escura e ía tapado por un pasamontañas, cando o home acendeu a luz da habitación.

Tras sacarlle o pixama á forza e pegarlle cinta illante na boca e na cabeza, o acusado tapoulle a cara coa roupa da cama e atouna de mans e pés, segundo explica o fiscal, para a continuación agredila en reiteradas ocasións e violala.

Antes de irse, o agresor colleu os 1.250 euros que a septuaxenaria tiña no seu bolso e, para evitar que esta pedise auxilio de inmediato, tirou o seu teléfono móbil ao lixo e abandonou a vivenda tras cortar a cinta coa que lle atara os nocellos.

O Celta afúndese aínda máis coa axuda dos árbitros

redacción
-
0
O Celta afúndese aínda máis coa axuda dos árbitros

O Celta colleitou unha nova derrota e, desta volta, contra un rival directo como é o Leganés, en boa parte, debido a unha decisión arbitral, como xa está acontecendo nos últimos partidos. Óscar García seguen sen pegada como adestrador, a diferencia do mexicano Javier Aguirre que logrou a súa primeira vitoria á fronte do Leganés.

Unha victoria na que tivo que ver, e moito, Óscar Rodríguez, con dous golazos, pero na que o Celta estivo a piques de empatar tras ir perdendo por 3-0 e tras quedar, na segunda parte, cunxogador menos pola expulsión de Gabriel Fernández.

Un feito que destacou o adestrador celeste, aínda que quixo suliñar a actitude dos seus xogadores para tentar sobreporse á adversidade. “Viuse unha reacción moi boa do equipo porque con todos os condicionantes, 3-1 no marcador cun menos, merecémonos marcar algún gol máis nos últimos minutos. Iso dime que os xogadores teñen ganas de reaccionar”, dixo.

“Xa sabía antes de chegar que tería moito traballo e por iso estou aquí. Queda moita liga por diante e estou convencido de que entre os xogadores, o corpo técnico e a afección, se remamos todos xuntos imos acabar facendo unha boa tempada”, engadiu.

“O Leganés na primeira parte fixo dous disparos e marcou dous goles. Tivemos o control, a posesión, pero sen ser profundos, e faltounos mobilidade para chegar á portaría rival”, comentou. “Na segunda entramos mellor, pero non podemos desaproveitar minutos, parece que necesitamos un golpe para reaccionar. Temos que facelo antes, saír con mentalidade de querer gañar o partido”, agregou.

Comeza o cribado á poboación de Tomiño ante a alta incidencia da Covid

redacción
-
0
Comeza o cribado á poboación de Tomiño ante a alta incidencia da Covid

O Sergas iniciou este mércores a realización dun cribado de COVID-19 á poboación de Tomiño para detectar novos casos asintomáticos.

Segundo precisou a xerencia da área sanitaria de Vigo, en colaboración co Concello de Tomiño, comezouse a convidar os residentes nesta localidade a realizarse unha proba diagnóstica no COVID-Auto do Hospital Álvaro Cunqueiro da urbe olívica. Deste xeito, este mércores pola tarde realizáronse as primeiras probas neste dispositivo.

En concreto, as persoas que decidan someterse á PCR deberán inscribirse nunha listaxe publicada polo Concello, tras o que o Sergas contactará con elas para concertar a cita.

Así, este procedemento busca alcanzar unha maior participación no cribado masivo dado que se presupón que unha persoa que se apunta de modo voluntario non faltará á cita. Desde a activación da inscrición, realizada este mércores pola mañá, rexistráronse 900 persoas.

Esta medida foi adoptada ante a elevada incidencia da COVID-19 observada nos últimos días neste municipio. O seu obxectivo é detectar o maior número posible de infectados que non presenten síntomas dado o risco que poden supoñer para a saúde pública ao continuar a súa vida diaria de modo habitual, o que pode levar a que contribúan á propagación do virus.

Audasa oponse á demanda da Fiscalía polas retencións durante as obras de Rande e nega práctica abusiva

E.P.
-
0
Audasa oponse á demanda da Fiscalía polas retencións durante as obras de Rande e nega práctica abusiva

A concesionaria da autoestrada AP-9, Audasa, presentou escrito ante o xulgado formulando a súa oposición á demanda presentada pola Fiscalía (e á que se adheriu a asociación En-Colectivo) polos prexuízos sufridos polos condutores durante as obras de ampliación da ponte de Rande, e no que alega que a súa actuación non se pode cualificarse de práctica abusiva.

No escrito, a empresa sinala, entre outras cuestións, que a afección ao tráfico durante a execución dos traballos (entre 2015 e 2018) era “ineludible”, e que tería sido “máis doado e menos custoso se as obras se executasen pechando a autoestrada ao tráfico”.

En todo caso, Audasa defende que cumpriu todas as “obrigas” que asumira nesa actuación, e que a execución dunha “obra de interese público” non pode ser cualificada como “práctica abusiva”, nin tampouco se lle pode responsabilizar de incumprir o seu contrato cos usuarios da autoestrada.

Por outra banda, a concesionaria tamén expón que os condutores tiñan unha alternativa “coñecida” e libre de peaxe (usando a N-550 entre Pontevedra e Vilaboa, e a N-554 entre Vilaboa e a ligazón do Morrazo), a pesar do que cal, “optaron libremente e con pleno coñecemento da existencia das obras”, por utilizar a ponte de Rande.

Ademais, abunda a empresa, o nivel de servizo prestado durante eses traballos foi “o adecuado” porque, pola contra, se denunciaron os problemas durante o período de execución das obras.

EN-COLECTIVO

Pola súa banda, a Asociación En-Colectivo expresou o seu rexeitamento a estes argumentos, e critica que é un intento da concesionaria por “dilatar” o proceso e eludir a súa responsabilidade, para evitar ter que indemnizar aos usuarios da AP-9.

A ese respecto, tachou de “inconsistentes” as explicacións da empresa, e lembrou que existe unha relación contractual pola cal os usuarios pagan unha peaxe, e deben recibir un servizo cunhas condicións determinadas de velocidade, seguridade e fluidez do tráfico.

Do mesmo xeito, nega que exista unha alternativa á ponte de Rande “coas mesmas prestacións e competitividade”, xa que o itinerario que suxire a empresa supón “duplicar o tempo investido en percorrer o mesmo traxecto”.

En todo caso, esta plataforma subliñou que a propia Audasa recoñece no seu escrito 86 incidencias (das algo máis de 200 retencións documentadas na demanda), e confirmou que manterá a súa reclamación para que se reintegren as peaxes aos afectados.

O proxecto artístico para a ponte de Rande que nunca se realizou

Comerciantes do Mercado acusan ó Concello de “rirse” deles polas obras en curso

E.P.
-
0
Comerciantes do Mercado acusan ó Concello de “rirse” deles polas obras en curso

Comerciantes do Mercado do Progreso, en pleno centro de Vigo, alertaron este xoves sobre a perda de clientes e o descenso de vendas debido ás dificultades para acceder á zona polas obras, e clamaron axuda para saír adiante, á vez que criticaron que o Concello non lles atende e “rise” deles.

Así o manifestaron, en declaracións aos medios, xunto co portavoz municipal do PP, Alfonso Marnotes e o edil Jesús Marco, que se trasladaron ao Mercado para facerse eco das demandas deste colectivo. Marnotes criticou que hai “unha continua improvisación” nas obras do centro de Vigo, con “solapamiento” de actuacións e “atrasos” que, como no caso da zona de Rolda don Bosco, Progreso ou Gran Vía, provocan que o acceso ao centro sexa “moi difícil” e mesmo “imposible algúns días”.

VENDAS REDUCIDAS Á METADE

Un dos comerciantes do Mercado de Progreso, Javier Vaqueiro, lamentou que, desde que se iniciaron as reformas nas rúas adxacentes, no principio do ano, os negocios do mercado viron minguar as súas vendas ata un 50 %. “Hai momentos en que é imposible chegar ata aquí”, sinalou, e lembrou que o tráfico se agrava nas entradas e saídas dos nenos dos colexios próximos.

Outra comerciante apuntou que “se quitan as ganas” de ir ao mercado, e tanto estes negocios como outros de ao redor “estanse morrendo”. A ese respecto, os comerciantes lembraron que moitos dos seus clientes ían desde a periferia da cidade, e facíano en coche, algo agora “imposible”, e os pequenos vendedores teñen que tentar sobrevivir, se poden, con repartición a domicilio.

“Levo neste mercado desde os 16 anos, desde antes da reforma, e nunca se viu tan baleiro. É unha desesperación, e pedimos reunirnos co alcalde, pero non hai maneira. Se é para comer ou para festas si que vén, para as queixas non está”, lamentou unha afectada.

A arte do secado do peixe

redacción
-
0
A arte do secado do peixe

O “peixe seco” é unha das tradicións mariñeiras da Guarda. Trátase dun milenario método de conservación que xa utilizaban, por exemplo, os exipcios e que consiste en extraer a auga co calor do sol e o vento, impedindo o desenvolvemento de bacterias e fungos. Hoxe, aínda hai quen segue esta tradición na Guarda coas mesmas técnicas que antano.

Francisco Javier Puente Prieto, novo xerente da área Sanitaria de Vigo

E.P.
-
0
Francisco Javier Puente Prieto, novo xerente da área Sanitaria de Vigo

O Sergas nomeou a Francisco Javier Puente Prieto como novo xerente da área Sanitaria de Vigo, en substitución de Xullo García Comesaña, tras ser designado conselleiro de Sanidade.

O novo xerente ata agora ocupaba o posto de director de Procesos Asistenciais na área Sanitaria de Ourense, Verín e O Barco de Valdeorras, informou o Sergas nun comunicado. O Sergas destacou que “conta cunha ampla traxectoria como xestor na sanidade pública galega”, na que xa exerceu diferentes postos de responsabilidade na área de Vigo en etapas anteriores.

Puente Prieto é licenciado en Medicina pola Universidade de Santiago, especialista en dirección estratéxica de hospitais pola Universidade Politécnica de Valencia. Iniciou a súa traxectoria profesional no ámbito da xestión sanitaria como subdirector médico do entón Complexo Cristal-Piñor, indican as mesmas fontes do Sergas, para posteriormente, ocupar o posto de director médico en 1999. En 2000 asumiu a dirección operativa, unha vez integrados os hospitais no CHUO.

Con posterioridade, ocupou en 2007 a xerencia do Hospital comarcal de Monforte de Lemos e a dirección de centros no Chuvi en 2009. A partir de 2012 responsabilizouse da dirección de Procesos Asistenciais na área Sanitaria de Ferrol e, desde 2015 ata 2018, exerceu como director de Procesos na área sanitaria de Vigo ata que se traladó a Ourense.

Localizados oito menores desaparecidos na xornada de praias do luns en Vigo

E.P.
-
0
Localizados oito menores desaparecidos na xornada de praias do luns en Vigo

Axentes da Policía Local de Vigo, con colaboración cidadá, localizaron ata oito menores desaparecidos na xornada de praias deste luns.

Segundo informou a Policía Local, na xornada de praias deste luns rexistráronse “ata oito desaparicións de menores”, pero tanto o “labor dos axentes da Unidade de Costa e Praia (Baías) como a colaboración cidadá, facilitaron a rápida localización dos menores nun breve período de tempo”.

Por outra banda, ás 13,03 horas deste luns, a Policía Local recibiu aviso na Sala de Comunicacións sobre unha muller que caeu por unha baldosa levantada na rúa García Barbón.

Cando a patrulla chegou ao lugar, a señora manifestou que caeu como consecuencia dunha baldosa levantada. Tamén comentou que, unha vez no chan, pedira axuda para levantarse, “notando molestias na boneca e xeonllo esquerdas”, indicaron as mesmas fontes.

A unidade policial desprazouse ao lugar para realizar o correspondente informe por caída en vía pública ao tropezar cunha tapa de rexistro de telefónica, “atopándose a beirarrúa levantada nese punto concreto”, abundaron as mesmas fontes policiais.

1...2.0192.0202.021...2.055Páxina 2.020 de 2.055

HOXE EN GALICIA

Loading RSS Feed

Xornal de Vigo é o primeiro gran xornal dixital en galego de Vigo e a súa área metropolitana

SÍGUENOS

© Xornal de Vigo - Xurimaru Servizos de Comunicación 2010 S.L.