Inicio Blog Páxina 1985

Unha explicación científica da NBA desde a Universidade de Vigo

redacción
-
0
Unha explicación científica da NBA desde a Universidade de Vigo

Nada, ou case nada, escapa de ser obxecto de ciencia. Por exemplo, a mellor competición de baloncesto do mundo, a NBA, pódese explicar científicamente mediante o estudo do rendemento físico dos seus xogares. Isto é o que fixo o investigador sueco Anton Kalén, da Facultade de Ciencias da Educación e do Deporte da Universidade de Vigo, en Pontevedra.

Kalén liderou unha investigación para avaliar os efectos da idade no rendemento físico e técnico do xogo para diferentes posicións en xogadores da NBA. En total, realizáronse nada menos que 25.523 observacións individuais de 532 xogadores en partidos da tempada 2018-19.

Os xogadores clasificáronse en catro grupos de idade: 19 a 22 anos, 23 a 25, 26 a 29 e 30 a 42. Analizáronse as diferenzas no rendemento físico e técnico en cada partido coas seguintes variables: distancia percorrida polo xogador, velocidade media, minutos xogados, puntos anotados e eficiencia de xogo (esta última calcula o impacto positivo e negativo que ten un xogador por medio dos puntos anotados, rebotes, asistencias, roubos, tapóns, lanzamentos e perdas de balón).

Os resultados mostraron que os xogadores maiores de 30 anos cubriron distancias máis curtas e tiveron unha velocidade media máis baixa que os máis novos. Tamén que os escoltas e aleiros maiores de 26 anos xogaron máis minutos por partido que os máis novos, e que os escoltas maiores de 26 anotaron máis puntos e foron máis eficaces que os máis novos, mentres que os pivotes de 23 a 25 anos anotaron máis puntos por xogo que os maiores de 30.

O estudo xustifícase na “ausencia de evidencia previa con respecto aos cambios no rendemento do xogo relacionados coa idade nos xogadores de baloncesto de elite”, polo que se fixo unha “análise a gran escala” para comprobar se se cumpre a hipótese de que o rendemento do xogo diminúe coa idade e de que esta sería diferente en función das posicións de xogo.

E o que se comprobou foi que “o rendemento físico diminuíu coa idade, mentres que o tempo de xogo e o rendemento técnico en xeral permaneceron estables ou aumentaron” cos anos, especialmente para os bases.

DISTANCIA, VELOCIDADE E EFECTIVIDADE

A maior distancia percorrida, en total, defensa e ataque, observouse no grupo de idade de 19 a 22 anos.

Os resultados mostran que existe unha diferenza na distancia total defensiva e ofensiva percorrida entre grupos de idade e que a diferenza non varía entre posicións. Tamén se observou que os xogadores no grupo de idade de 26 a 29 cobren menos distancia en total, ofensiva e defensiva, que os xogadores dos grupos máis novos, mentres que non houbo diferenzas significativas entre os demais.

A velocidade media máis rápida, en total, defensa e ataque, observouse no grupo de 19 a 22 anos, confirmándose importantes diferenzas por idades (menos rápidos canto máis maiores), pero non por posicións.

O maior número de minutos xogados observouse no grupo de idade de 26 a 29 anos, mentres que os de 30 a 42 gozaron de máis tempo que os dous grupos máis novos. Nesta variable, detectáronse diferenzas notables nos minutos xogados entre grupos de idade nestas posicións: os bases e escoltas no grupo de idade de 23 a 25 xogaron menos minutos que os maiores, e os aleiros do grupo de 19 a 22 anos xogaron menos minutos que os de máis de 26.

Sobre a efectividade dos xogadores, o número de puntos por minuto é maior no grupo de idade de 26 a 29 e, aínda que diminúe no de 30 a 42, os xogadores máis maiores son máis efectivos que os dous grupos máis novos. Tamén se constatou que esta diferenza varía notablemente entre estas posicións: bases e escoltas no grupo de idade de 23 a 25 obtiveron menos puntos que os de 26 a 29 e os de 30 a 42; os pivotes do grupo de idade de 23 a 25 obtiveron máis puntos que os de 30 a 42 anos.

En resumo, o estudo destaca como principais resultados que os xogadores da NBA maiores de 30 anos mostraron valores máis baixos en distancia percorrida (total, ofensiva e defensiva) e velocidade media (xeral, ofensiva e defensiva), en comparación con xogadores máis novos; que os escoltas e aleiros maiores de 26 anos xogaron máis minutos por partido en comparación cos máis novos na mesma posición de xogo; e que os xogadores maiores de 26 anos mostraron unha eficacia no xogo significativamente maior en comparación cos máis novos.

O estudo publicouse na revista científica Research in Sports Medicine e está asinado, ademais de por Anton Kalén, por Alexandra Pérez Ferreirós (Centro de Investigación Biomédica en Red Fisiopatología de la Obesidad y Nutrición – CIBEROBN, dependente do Instituto de Salud Carlos III), Pablo B. Costa (Centro de Rendemento Deportivo da Universidade Estatal de California) e Ezequiel Rey (Facultade de Ciencias da Educación e do Deporte da Universidade de Vigo).

Feijóo inicia a precampaña no bastión de Abel Caballero presumindo da xestión do coronavirus

redacción
-
0
Feijóo inicia a precampaña no bastión de Abel Caballero presumindo da xestión do coronavirus

O presidente da Xunta e candidato á reelección polo PPdeG, Alberto Núñez Feijóo, cambiou de opinión en menos dunha semana e pasou de dicir que o seu partido non faría precampañpa electoral a lanzarse a facela esta mesma fin de semana. Así, nun acto en Vigo avanzou que a campaña dos populares para os comicios autonómicos do 12 de xullo estará centrada en lanzar propostas contra a “pandemia económica” que se divisa tras a crise sanitaria da COVID-19 e vendendo a súa xestión fronte ao coronavirus.

“Non estamos aquí para derrotar a ninguén. Non nos presentamos ás eleccións para darlle un repaso a ninguén, presentámonos ás eleccións para ser útiles”, reivindicou este sábado Feijóo, durante un sinxelo acto de partido no Museo do Mar de Galicia, en Vigo, co que retomou a precampaña cunha cita coas urnas que, prevista inicialmente para o 5 de abril, viuse truncada pola pandemia do coronavirus.

Coa exdelegada da Xunta na cidade olívica, Corina Porro, como número dous da candidatura por Pontevedra e como anfitrioa do acto, o líder do PPdeG –que ocupa o posto ‘un’ pola mesma provincia– estivo acompañado das cabezas de lista polo resto de circunscricións: a conselleira Ángeles Vázquez, pola Coruña; a presidenta do PP provincial de Lugo, Elena Candia; e a exdelegada da Xunta en Ourense, Marisol Díaz.

Co mar de fondo, Feijóo iniciou o seu discurso sacando peito de que a Comunidade galega é “a rexión europea máis competitiva” no sector da pesca, para seguidamente agradecer aos profesionais da sanidade galega, dos servizos sociais e a “todos os que traballaron para manter os servizos esenciais” o seu labor durante a pandemia.

VIGO DEU UNHA RESPOSTA “Á ALTURA”

No seu discurso, Feijóo tamén abordou os pasados tres meses “moi longos, tristes e duros” que viviu Galicia, onde 619 persoas perderon a vida como consecuencia da COVID-19. No caso concreto de Vigo, afirmou que a súa resposta estivo “á altura”.

“Aquí fomos pioneiros no ‘COVID-Auto’ que despois copiaron outros hospitais de España — un sistema que propuxeron os propios sanitarios e non o Sergas–. Aquí funcionou un dos mellores laboratorios de microbioloxía de Europa facendo miles de PCR contando de forma simultánea distintas técnicas e descubrindo unha forma masiva de detección do virus”, abordou o tamén presidente da Xunta.

E é que, segundo as súas palabras, “en ningún momento” Vigo tivo un risco de colapso sanitario e foi “unha das poucas grandes cidades de España” que non precisou despregar un hospital de campaña –na Comunidade galega non se chegaron a empregar, aínda que o Sergas chegou a planificar un en Santiago e outro na Coruña–, o cal foi posible grazas ao “esforzo de todos nos últimos anos” para converter o complexo hospitalario vigués en “referencia”.

“Esta pandemia puxo a proba o sistema sanitario público español. E en Galicia, e especialmente en Vigo, creo que se respondeu con nota”, expresou o candidato do PPdeG.

O CORONAVIRUS “SEGUE AÍ”

Tras advertir que “lamentablemente” o coronavirus “segue aí”, dixo que o que se aveciña agora son “as consecuencias económicas demoledoras” e os “grandes problemas sociais” derivados desta situación.

Iso si, do mesmo xeito que “Galicia demostrou a si mesma que é capaz de anticiparse e remontar” ante as dificultades sanitarias, o candidato popular mostrouse “convencido de que tamén será capaz de superar antes que outras terras as dificultades económicas e sociais”.

QUE A XENTE “ACUDA Ás URNAS” O 12

Por iso, e en vista de que a superación da “pandemia económica” vai necesitar “a implicación de todos”, o candidato á reelección fixo un chamamento a que a xente “acuda ás urnas o 12 de xullo con tranquilidade” para que “simplemente vote o que crean oportuno” e elixa “a opción política que crea que é mellor”.

A morte dun operario saca a centos de traballadores do naval ás rúas de Vigo para denunciar “precariedade”

E.P.
-
0

Máis dun milleiro de traballadores de estaleiros e industrias auxiliares do naval manifestáronse este martes polas rúas de Vigo, en varias marchas que confluíron ante a delegación territorial da Xunta de Galicia, para denunciar a “precarización” do sector e a falta de control sobre as empresas, todo iso horas despois do falecemento dun operario que estaba a traballar nun barco e que foi esmagado por un portón metálico.

Á primeira hora da mañá os operarios partiron desde os diferentes centros de traballo e concluíron a súa marcha ante a delegación da Xunta, onde gardaron un minuto de silencio en memoria do seu compañeiro.

En declaracións aos medios, o responsable do naval da CIG na comarca, César Rodríguez, subliñou que “todos os días” hai incidencias nas empresas, “unhas máis graves e outras menos graves”, e que son resultado da precarización dun sector sobre o que apenas se exerce o control por parte das administracións.

A ese respecto, puxo o foco nas pequenas empresas auxiliares multiservizos que, na súa opinión, convertéronse en “tratantes de carne humana”, e reclamou que se convoque, tal e como demanda o sector desde hai anos, a mesa do naval. Así mesmo, incidiu en que “é primordial que a administración e a Inspección” cumpran as súas funcións.

A ADMINISTRACIÓN “MIRA PARA OUTRO LADO”

Pola súa banda, o responsable de Industria de UGT, Rubén Pérez, proclamou que “a administración debe deixar de mirar para outro lado” ante un sector atomizado, no que o tamaño das empresas dificulta o cumprimento das medidas de prevención e saúde laboral. “No subsector da reparación agrávase máis a exposición aos accidentes, ao non facerse no interior de estaleiros cunhas mínimas condicións“, engadiu.

“Non pode ser que un traballador saía da súa casa e non saiba se vai volver por unhas condicións moi complicadas”, recalcou, e urxiu a convocatoria das mesas de diálogo, porque “a competitividade non se poida gañar a base de precarización”.

Mentres, o responsable de Industria en CC.OO. Galicia, Víctor Ledo, criticou o “incumprimento” da Xunta, que hai un ano “comprometeuse a convocar unha mesa” para defender a industrialización e acabar coa precariedade.

Na mesma liña, o portavoz de Industria deste sindicato en Vigo, Celso Carneiro, lamentou que “a política industrial da Xunta de Galicia é cero“, e cada día o traballo é “máis precario, con máis presión”. “A Xunta non quere á industria do naval, prefire apostar polo Xacobeo”, ironizou, e advertiu de que o goberno galego que salga das eleccións do 12 de xullo “terá que sentar a falar” con este sector.

A xuízo en Vigo unha muller por perseguir e vixiar con prismáticos a actual parella do seu exmozo

E.P.
-
0
A xuízo en Vigo unha muller por perseguir e vixiar con prismáticos a actual parella do seu exmozo

A Fiscalía pide un ano e tres meses de cárcere para unha muller, M.J.P.A., á que atribúe un delito de acoso, por perseguir, vixiar e confrontar coa parella do seu exmozo, e que será xulgada este luns na sala do Penal 1 de Vigo.

Segundo o escrito de acusación pública, a procesada mantén, polo menos desde novembro de 2017, unha “actitude de persecución e confrontación” con outra muller, por mor de que esta iniciase unha relación co seu exmozo.

Así, relata a Fiscalía, a acusada presentábase “diariamente” na estación de buses de Gondomar, onde a prexudicada acudía para tomar un autobús e ir a Vigo a traballar. Á volta da xornada laboral, M.J.P.A. tamén a estaba esperando.

Tras unha intervención da Policía Local, a acusada deixou de falar coa noiva do seu ‘ex’, pero seguiu perseguíndoa, presentábase onde estaba e quedábaselle mirando, e mesmo chegou a seguila ata o seu domicilio.

Ao longo do día, M.J.P.A. vixiaba a vivenda da prexudicada cuns prismáticos, perseguíaa cando saía á rúa, acudía ás mesmas cafetarías, ou a esperaba fóra dos caixeiros automáticos se a vítima estaba a sacar diñeiro ou facendo algunha xestión.

Segundo o ministerio público, a procesada chegou perseguir á filla da vítima, e mesmo se presentou no traballo da súa irmá, coa que non tiña ningunha relación.

PRISIÓN, INDEMNIZACIÓN E AFASTAMENTO

Toda esta situación provocou que a parella do seu exmozo sufrise un trastorno adaptativo, que precisou de tratamento farmacolóxico e que, como secuela, quedase un trastorno derivado do eventual retorno do factor estresante.

Por todo iso, a Fiscalía solicita que M.J.A.P. sexa condenada a un ano e tres meses de prisión por un delito de acoso, e ao pago de indemnizacións por algo máis de 7.000 euros. Tamén solicita que se lle prohiba achegarse a menos de 100 metros da vítima ou o seu domicilio, e que non poida comunicarse con ela durante 2 anos e 3 meses.

Denunciado por atropelar o encargado dunha empresa de aluguer de vehículos tras discutir ao devolver unha furgoneta

E.P.
-
0
Denunciado por atropelar o encargado dunha empresa de aluguer de vehículos tras discutir ao devolver unha furgoneta

Un home de 37 anos domiciliado en Vigo foi denunciado tras, supostamente, atropelar o responsable dunha empresa de aluguer de vehículos da cidade co que discutiu despois de devolver unha furgoneta que presentaba unha das súas rodas fendida.

Fontes policiais detallaron que os feitos tiveron lugar este xoves sobre as 18,27 horas, cando o responsable dunha empresa de aluguer de vehículos situada na zona do aeroporto de Peinador informou de que fora atropelado por un cliente e que este se deu á fuga. Así, o fillo deste home perseguiu o vehículo, que interceptou na avenida do Aeroporto, á altura do colexio Martín Códax, no momento no que chegaron ao lugar axentes da Policía Nacional.

Deste xeito, o fillo da vítima explicou aos efectivos policiais que o seu pai contactara con el para alertarlle de que unha parella devolvera unha furgoneta cunha das súas rodas fendidas, polo que lle reclamou a súa reparación. Así, aseguroulle que se iniciou unha discusión durante a que un dos clientes cargou a roda nun turismo, atropelouno e fuxiu.

Pola súa banda, o condutor recoñeceu parte dos feitos ante os policías, aínda que asegurou que, tras cargar a roda no maleteiro para reparala, o encargado increpárao. Así, explicou que comezou unha discusión entre ambos, polo que quixo abandonar o lugar. No entanto, sinalou que o responsable da empresa se interpuxo no seu camiño e que, aínda que tentou esquivalo, abalanzouse sobre o vehículo e golpeou o espello retrovisor. A acompañante do condutor, de 33 anos, apoiou a súa versión.

Mentres, outra patrulla desprazouse ao lugar dos feitos e identificou á vítima, un home de 50 anos domiciliado en Vigo que presentaba feridas nun brazo e un corte na cabeza. Así, solicitouse unha ambulancia para atender a esta persoa, que foi trasladada ao Hospital Vithas Fátima. Así mesmo, unha testemuña corroborou que este home fora atropelado.

Adicionalmente, comprobouse que ao condutor lle constaba unha perda de vixencia de calquera tipo de permiso ou licenza e, tras ser sometido a unha proba determinante do consumo de drogas, arroxou un resultado positivo en anfetaminas. Así, foi denunciado por conducir baixo os efectos das drogas e sen o permiso correspondente, ademais de por a comisión dun suposto delito de lesións.

Segundo caso de coronavirus na residencia da Xunta en Nigrán na que se pretendía protexer os anciáns

redacción
-
0
Segundo caso de coronavirus na residencia da Xunta en Nigrán na que se pretendía protexer os anciáns

A residencia de Tempo Libre da Xunta en Patos, Nigrán, habilitada para reacoller a usuarios de centros xeriátricos que estean libres de coronavirus, rexistrou un segundo caso positivo por COVID, segundo confirmaron fontes autonómicas.

Así, unha segunda muller, tamén procedente da residencia DomusVi do barrio vigués de Barreiro, e que fora trasladada a Nigrán, deu positivo por COVID-19, e será trasladada novamente á residencia xeriátrica viguesa, xa que o seu estado non require ingreso hospitalario.

A residencia de Nigrán foi habilitada para reacoller aos usuarios sans dos centros DomusVi de Cangas e de Barreiro, ambos os dous intervidos pola Xunta. Ata ese centro trasladouse a 22 maiores procedentes de ambas as residencias, aos que se someteu a diversas probas para corroborar que estaban libres do virus, antes do traslado.

A ese respecto, a administración autonómica lembrou que cada un dos residentes traslados a Nigrán foi sometido a tres probas (2 PCR e unha de anticorpos), e todos eles deron negativo, o mesmo que os traballadores do centro de Patos.

DOUS POSITIVOS

Nas últimas horas, unha muller procedente da residencia DomusVi de Barreiro foi trasladada ao hospital Álvaro Cunqueiro de Vigo, despois de que se lle realizaron novas probas (que confirmaron o positivo), tras ter síntomas respiratorios.

Así mesmo, pouco despois, unha segunda muller procedente do mesmo centro xeriátrico tamén presentou síntomas, e confirmouse a infección por coronavirus. No seu caso, será trasladada de volta ao centro de Barreiro porque a súa situación non require ingreso hospitalario.

Fontes da Xunta aclararon que, en ambos os casos, axiña que apareceron os síntomas, as mulleres foron illadas na residencia de Nigrán, onde hai 6 habitacións preparadas para continxencias deste tipo.

As mesmas fontes precisaron que “tanto os usuarios como o persoal da residencia de Patos seguen estritamente todos os protocolos de protección, limpeza e distancia recomendados polas autoridades sanitarias”.

Marea Galeguista non ve positivo que unha forza política teña maioría absoluta

E.P.
-
0
Marea Galeguista non ve positivo que unha forza política teña maioría absoluta

O candidato de Marea Galeguista á Presidencia da Xunta nas eleccións autonómicas que se celebrarán o próximo 12 de xullo, Pancho Casal, avogou por potenciar a industria pesqueira na comunidade e “incrementar o prestixio e valorización” dos produtos.

Tras unha reunión mantida este venres con representantes da Cooperativa de Armadores de Vigo (Arvi) na cidade olívica, Pancho Casal insistiu na importancia de incrementar o prezo de produtos da pesca e apuntou ás certificacións internacionais como un dos aspectos que poden contribuír nesa liña.

Ademais, incidiu na necesidade de reivindicar os “valores propios” da comunidade. “Non pode ser que esteamos a vender a empresas de fóra e trasladando valor fóra de Galicia, cando todo se podería desenvolver aquí”, sinalou en relación á cadea de distribución.

Neste sentido, o candidato de Marea Galeguista á Presidencia do Goberno autonómico detallou a aposta da súa formación pola alimentación sustentable e remarcou que a pesca representa a actividade produtora de proteína animal que “emite menos CO2”.

Así mesmo, Pancho Casal criticou que, en 2018, o 48% da partida incluída para o sector pesqueiro nos orzamentos da Xunta non se executase, o que, segundo apuntou, representou un montante de 75 millóns de euros.

Así, lamentou que se devolveron fondos europeos e que se achacou esta situación á falta de solicitudes de axudas procedentes dunha industria que presenta necesidades relacionadas con “a modernización das súas instalacións, o desenvolvemento de protocolos de sustentabilidade e a mellora de vida nos barcos”.

Adicionalmente, Casal asegurou que, se ostenta responsabilidades de goberno na Xunta tras as eleccións galegas do 12 de xullo, Marea Galeguista impulsará “a agroganadería, a pesca, a enerxía renovable e todos os valores de Galicia” mediante investimento autonómico e unha aposta por I+D+i..

A cabeza de lista da formación pola provincia de Pontevedra, Peque González, destacou ademais o compromiso de Marea Galeguista cunha Formación Profesional (FP) Dual enfocada no sector marítimo-pesqueiro, unha demanda que, segundo explicou, foi trasladada polos representantes de Arvi no encontro mantido este venres.

REPRESENTACIÓN CIDADÁ

Preguntado polos medios, Pancho Casal resaltou a necesidade de que ningunha forza política alcance unha maioría absoluta no Parlamento de Galicia para que “non se impoña a visión dunha soa parte” dos cidadáns. Así, incidiu na importancia de que a política se desenvolva na Cámara galega.

Nesta liña, asegurou que, se resulta “decisiva” no Parlamento de Galicia, Marea Galeguista traballará para que os votantes do PP “tamén estean representados nas políticas que se desenvolvan”, o que, segundo apuntou, pasa por que esa formación “estea na oposición”.

De feito, reprobou que a maior parte das iniciativas que presentou na última lexislatura, cando exerceu como deputado de En Marea, “fosen rexeitadas sen debaterse“. Por iso, concluíu que a política “non pode seguir así”. Tamén insistiu na importancia de que se teña en conta a opinión das distintas forzas para levar a cabo a distribución dos fondos que se recibirán para a reconstrución económica de Galicia.

Navantia, a diferencia de Citröen, limitará a presenza de traballadores para “preservar a súa saúde”

redacción
-
0
Navantia, a diferencia de Citröen, limitará a presenza de traballadores para “preservar a súa saúde”

A empresa naval pública Navantia limitará desde este luns a presenza de operarios nos dous estaleiros que ten situados a ambas as marxes da ría de Ferrol, xa que só permitirá o acceso daqueles “traballadores asociados ás actividades consideradas como imprescindibles ou esenciais” tanto da principal como das auxiliares.

Así o trasladou a compañía pertencente á Sociedade Estatal de Participacións Industriais (SEPI) nun comunicado remitido no mediodía deste domingo, primeira xornada do estado de alarma decretado polo Goberno central ante a crise sanitaria do coronavirus.

Dita decisión foi adoptada tras manter durante o fin de semana diversos encontros coa parte social, “co fin de preservar a saúde dos nosos empregados, os nosos colaboradores e os nosos clientes”.

É por iso que Navantia decidiu tomar estas “medidas excepcionais e por tempo limitado, que sexan necesarias para garantir a saúde dos traballadores á vez que se mitiga o impacto sanitario, social e económico”.

TELETRABALLO

Ao mesmo tempo, a empresa pública manterá “todas aquelas actividades que non requiran presenza física utilizando todos os medios de conexión e informáticos dispoñibles”.

Ademais, creará un Comité de Emerxencia Central que terá o labor de “realizar un seguimento das medidas que se vaian tomando” e “coordinar” o resto de comités de emerxencia de cada centro de traballo, composto por responsables de cada un dos estaleiros e representantes dos traballadores, “que se reunirán diariamente”.

PSA Vigo decide manter a actividade a pesar das demandas dos sindicatos

redacción
-
0
PSA Vigo decide manter a actividade a pesar das demandas dos sindicatos

A planta PSA Peugeot Citroën de Vigo opta por manter a súa actividade “mentres a situación, o marco legal e a subministración de pezas o permitan”, pero decide “intensificar a actuación preventiva” fronte ao novo coronavirus.

Despois de que os sindicatos pedisen a paralización da actividade da planta, fontes da dirección lembraron que a declaración do estado de alarma por parte do Goberno “autoriza a continuidade da actividade industrial e os movementos das persoas para acudir ao traballo”.

En vista de que opta por continuar coa produción, PSA asegura que “intensifica a actividade preventiva” a través de “medidas destinadas a asegurar o distanciamento social recomendado” entre os empregados.

Estas solucións, que se concretarán este domingo nunha reunión co comité de empresa, súmanse a outras xa implantadas como o “reforzamento” da limpeza, a “prohibición de viaxes”, os protocolos “para evitar que entren persoas que estivesen en zonas de risco”, ademais doutras recomendacións que “minimicen o risco de contaxio”.

Xa o venres, a dirección da planta de PSA en Vigo propuxo que os empregados poidan utilizar bolsas de horas ou permisos retribuídos, traballar a distancia para coidar os seus fillos ante a suspensión das clases e “todos os mecanismos de flexibilidade dispoñibles”.

No entanto, este sábado o sindicato Central Unitaria de Traballadores (CUT) remitía a Recursos Humanos un escrito no que argumentaba que unha empresa con miles de contactos entre os seus traballadores é “un posible foco de propagación” do coronavirus, polo que piden “non correr o risco” de primar “a produción por encima da saúde”.

Denuncian que o Porto de Vigo trata de “bloquear calquera proxecto industrial” nas instalacións de Vulcano

E.P.
-
0
Denuncian que o Porto de Vigo trata de “bloquear calquera proxecto industrial” nas instalacións de Vulcano

A sección de Industria de CC.OO. en Vigo denuncia que a Autoridade Portuaria de Vigo, con José Enrique López Veiga á cabeza, trata de “bloquear calquera proxecto” para as instalacións do estaleiro Vulcano. A Xunta “permíteo e impulsa a desindustrialización de Galicia”, engade o sindicato.

En concreto, CC.OO. refírese a un informe de alegacións da Avogacía do Estado que, en representación do Porto, solicitou o pasado 8 de maio ao Xulgado do Mercantil Número 3 de Pontevedra -con sede na cidade olívica- “manter en suspenso calquera actividade de execución do plan de liquidación” da empresa ata que o Consello de Estado se pronuncie sobre a concesión dos terreos portuarios.

Cabe lembrar que a Audiencia Provincial de Pontevedra avalou en abril, a través dun auto que non é susceptible de recurso, que a concesión forme parte do activo previsto no proceso de liquidación de Vulcano, o cal implicou desestimar a postura da propia Autoridade Portuaria. No seu momento, López Veiga sinalou que “cando hai unha sentenza firme acátase e punto”.

Con todo, o informe da Avogacía do Estado para pedir a suspensión da liquidación, ao que se remite CC.OO. para denunciar que o Porto trata de “bloquear calquera proxecto” nestes terreos, recalca que a sentenza da Audiencia pontevedresa, “carente de precedentes na doutrina xudicial española”, supón unha “evidente inmisión nun ámbito de decisión privativo” da Administración concedente.

Por iso, a Avogacía asegura que esta “anómala situación” esixe “esperar ao ditame” do Consello de Estado, xa que a Autoridade Portuaria mantén a súa confianza en que esta institución avale a extinción da concesión.

“EVITAR CALQUERA PROXECTO”

Ao coñecer este informe no que se pide a suspensión do proceso de liquidación, CC.OO. denuncia que López Veiga “segue no seu empeño de bloquear e evitar calquera proxecto industrial” para as instalacións de Vulcano “a pesar de que asumira publicamente que respectaría o auto xudicial”. Con todo, fontes do sindicato indican que os administradores concursais “están a analizar se contestar ou non” ao escrito.

A decisión da Audiencia Provincial fora celebrada non só polos sindicatos, senón tamén pola Asociación de Industriais Metalúrxicos de Galicia (Asime). A patronal valorou entón que o mantemento da concesión permitiría a continuidade da actividade nas instalacións e que “se manteñan as ofertas” de posibles compradores.

1...1.9841.9851.986...2.069Páxina 1.985 de 2.069

HOXE EN GALICIA

Loading RSS Feed

Xornal de Vigo é o primeiro gran xornal dixital en galego de Vigo e a súa área metropolitana

SÍGUENOS

© Xornal de Vigo - Xurimaru Servizos de Comunicación 2010 S.L.