O alcalde de Vigo, Abel Caballero, anunciou que o goberno local aprobou o marco orzamentario para os anos 2025, 2026 e 2027, nos que prevé investimentos por valor de 33 millóns de media en cada exercicio. Nun audio remitido aos medios de comunicación, o rexedor reivindicou que o Concello olívico “sempre está en tempo e prazo”, polo que tras aprobar o marco orzamentario xa poderá comezar a elaborar os orzamentos de 2025.
Tal como dixo Caballero, Vigo volverá cumprir “todas as regras fiscais”. El avanzou que se investirán 33 millóns de euros ao ano e que se destinarán uns 164 millóns ao mantemento dos servizos públicos cada exercicio.
Caballero destacou a súa xestión, xa que Vigo conta con “débeda cero”, a pesar de que segue destinando recursos para realizar humanizacións, zonas verdes ou ascensores, entre outros.
