A catedrática Carmen García Mateo será a primeira reitora da Universidade de Vigo nos 36 anos de historia da institución académica, tras imporse na segunda volta das eleccións á súa opoñente, Belén Rubio. Este resultado marca un fito histórico na gobernanza da universidade, que por primeira vez estará encabezada por unha muller.

García Mateo obtivo o 56,02% dos votos ponderados, o que supón un total de 1.926 sufraxios. A candidata logrou ser a máis votada na práctica totalidade dos sectores, coa única excepción do sector B, correspondente ao persoal docente e investigador non funcionario. Pola súa banda, Belén Rubio acadou o 43,98% do voto ponderado, sumando .1512 apoios.

A análise por campus amosa que a candidatura de García Mateo foi a máis apoiada nos centros de Vigo e Pontevedra. Pola contra, no campus de Ourense, Belén Rubio logrou ser a máis votada en todos os sectores, agás no sector D, que agrupa ao Persoal Técnico, Xestión e Administración, e Servizos.