Asi o denunciou o presidente da Asociación de Veciños de Chapela aos micrófonos de Radio Redondela logo de que Augas de Galicia, dependente da Xunta, lles reclamase o pago dunha taxa por ter acometido a limpeza do río Maceiras.
A xornada de limpeza fora convocada por esta asociación en colaboración co Concello de Redondela a finais do mes de setembro. Unha acción bastante extendida, con accións anuais como as xornadas de “Móllate polos ríos” que tamén teñen lugar en concellos como o de Gondomar.
Este tipo de iniciativas voluntarias pretenden concienciar da importancia e coidado dos ríos e serven tamén como unha denuncia gráfica do deslexo amosado no mantemento dos mesmos.
A sorpresa chegou cando Augas de Galicia remitiu ao colectivo veciñal unha factura en concepto de taxas “por ter acometido a limpeza do río”. O importe reclamado é de 36€.
Dende o colectivo veciñal denuncian que pese a ser un importe “simbólico” non deixa de ser inaudito que a administración dependente da Xunta de Galicia “non só non faga o seu traballo, xa que deberían ser eles que se encargaran da limpeza dos ríos, senón que nos pasan unha taxa por retirar o lixo do Maceiras ao seu paso por Chapela”.
Na xornada de limpeza participaron 20 veciños e veciñas que retiraron todo tipo de lixo, entre outros a “porta dun coche”.
Aquí o audio da entrevista
