A Federación Olívica de Asociacións de Nais e Pais de Centros Escolares de Vigo (Foanpas) denunciou “carencias de profesorado” e “caos” no transporte escolar neste inicio de curso, ao tempo que insistiu na necesidade de melloras nos centros educativos. Nunha rolda de prensa, nais e pais de alumnado criticaron que “non é algo novo”, xa que cada curso se repiten estes problemas, que se dan na maioría dos centros da cidade.

En concreto, algúns colexios solicitaron persoal coidador para alumnado con necesidades específicas, mentres outros pediron máis persoal especialista, entre outras moitas reivindicacións de cada colexio. Ademais, repetiuse a incidencia no transporte escolar nos centros, segundo apuntan desde Foanpas, con modificacións de horarios e paradas sen avisar nin aos centros nin ás familias, lamentan. “Os edificios dos centros educativos teñen, na súa maioría, moitos anos. Isto pasa factura e faise necesario facer obras de acondicionamento no illamento dos edificios, baños modernos e adaptados, retirada de amianto…”, insistiron desde a asociación.