Vox presentou este martes unha denuncia ante a sección de instrución do Xulgado de Primeira Instancia de Cangas do Morrazo polo incidente rexistrado o pasado sábado nunha mesa informativa da formación nesta localidade. A presenza policial foi necesaria durante o episodio, no que se produciu un cruce de berros entre participantes e opositores á mesa. Segundo informou, a denuncia recolle que “varios individuos se concentraron de maneira intimidatoria fronte á carpa informativa, ocuparon parcialmente o espazo reservado para a actividade despregando bandeiras, dificultaron o acceso dos veciños interesados e corearon reiteradamente consignas como ‘Fuera machistas!’ e ‘¡Fuera fascistas!'”.

“Nunha das oito gravacións achegadas como proba escóitase con claridade a ameaza ‘¡Os mato!’, dirixida directamente a Álvaro José Díaz-Mella López, presidente do Comité Executivo Provincial de Vox en Pontevedra e presente durante toda a actividade”, engade a formación. A denuncia atribúe provisionalmente aos participantes aínda non identificados delitos de ameazas, impedimento ou perturbación grave do exercicio das liberdades de reunión e manifestación e delito de odio. A denuncia, presentada por Vox como partido e polo propio Díaz-Mella, diríxese “contra os participantes aínda non identificados”.

INCIDENTE EN SANTIAGO

Por outra banda, fontes da formación trasladaron que o departamento xurídico tamén está a estudar o sucedido en Santiago o pasado luns, onde centenares de persoas impediron a celebración dun acto político de Vox no centro sociocultural de Santa Marta. A protesta derivou nun dispositivo policial e acabou cunha carga. As querelas que analizan os servizos xurídicos do partido irían dirixidas tanto contra a alcaldesa de Santiago, Goretti Sanmartín, como contra a subdelegada do Goberno na Coruña, Obdulia Taboadela, por considerar que son “quen terían que garantir o desenvolvemento do acto político”. Vox xa responsabilizou publicamente as autoridades do sucedido no acto compostelán.