A Policía Nacional de Vigo confirmou a detención de tres persoas, implicadas nunha liorta que tivo lugar entre feirantes á primeira hora da tarde no barrio de Coia, e na que se estaban empregando machetes e outras armas brancas.

Os feitos ocorreron sobre as 14,00 horas deste xoves, cando as forzas policiais tiveron coñecemento da pelexa, ocorrida nas inmediacións da rotonda onde está o barco de Alfageme, no populoso barrio de Coia, na zona onde se están instalando as atraccións para as festas, que comezan este fin de semana.

Fontes policiais explicaron que, no marco desta actuación, producíronse tres detencións, e que unha das persoas detidas tivo que ser trasladada ao hospital Álvaro Cunqueiro. De momento, descoñécese o estado do ferido ou os motivos que desencadearon a liorta.