A Comisión de Industria, Comercio e Turismo aprobou este mércores unha iniciativa do PP que insta o Goberno a incluír na nova planificación 2021-2026 a subestación de alta tensión para a fábrica Stellantis de Vigo.
A moción saíu adiante con 14 votos a favor e 14 abstencións, as do PSOE e ERC. O encargado de defender a iniciativa, o senador galego Javier Guerra, lamentou que a cidade de Vigo “quedou excluída do acceso á alta tensión na planificación de redes eléctricas ata o ano 2026”.
Por iso, finalmente a Cámara Alta fixo seu o texto presentado polo PP que esixe ao Goberno a solicitude da inclusión en Planificación da Rede de Transporte de Enerxía Eléctrica das actuacións de Pazos de Borbén-Novo Vigo; Atios-Novo Vigo; Atios-Pazos de Borbén e Novo Vigo.
“Stellantis está a dicirnos que necesita xa a moi alta tensión e que a vai a necesitar aínda máis. Desatender esta advertencia é unha enorme irresponsabilidade”, proclamou o senador galego.
