A factoría viguesa da compañía automobilística Stellantis parará unha das súas liñas de produción a partir deste martes e ata o vindeiro luns, día 21 de febreiro, pola falta de determinados compoñentes necesarios para os seus vehículos.
Así, tal como indicou a empresa, o seu Sistema 1 (que monta o Peugeot 301, o Peugeot 2008 e o Citroën C-Elysée) deterase a partir deste martes ás 06,00 horas para as quendas de mañá, tarde e noite. A previsión espera poder retomar a actividade o vindeiro luns ás 06,00 horas.
Todo iso debido á chamada crise dos microchips, que afecta a todo o sector automobilístico e motivou varios paróns na factoría de Balaídos nos últimos meses.
“Se esta previsión evolucionase, a xerarquía informará os equipos sobre a data e hora de reincorporación. Non hai información polo momento sobre a posible afectación para o equipo de fin de semana do Sistema 1”, explicou a firma.
