A Cooperativa de Armadores de Pesca do Porto de Vigo, ARVI, reiterou este mércores a súa demanda de que o peixe teña un IVE “superreducido” do 4 por cento, do mesmo xeito que outros alimentos considerados básicos, e subliñou que o complexo mar-industria foi un “alicerce fundamental” da cadea de subministración á poboación durante a pandemia de coronavirus.

Desde o inicio desta pandemia, subliñou ARVI, o sector demostrou o seu “compromiso” garantindo esa subministración e que os consumidores puidesen dispor dun produto que “contribúe significativamente a garantir a saúde dos cidadáns”.

Por todo iso, os armadores, que xa o pediron hai un ano, volveron a solicitar que se aplique un IVE reducido ao peixe, algo “oportuno” na actual situación de crise provocada por esa pandemia do COVID.

Segundo defendeu, o consumo de peixe é “sinónimo de investimento en saúde”, e reducir o IVE “mellorará a posibilidade de adquisición dun produto esencial”. Elevar o consumo de peixe, engadiron os armadores, potenciará as condicións de saúde da poboación e, “indirectamente, lograrase unha redución do gasto sanitario futuro”.