O presidente do Celta de Vigo, Carlos Mouriño, criticou este xoves ao Concello de Vigo por “mentir permanente e constantemente” sobre as obras acometidas na bancada de Marcador do estadio municipal de Balaídos, polo que o goberno local respondeu asegurando que xa acabou a súa parte e que agora só faltan as actuacións que teñen que realizar o propio club e a liga de Fútbol Profesional.
En rolda de prensa, Mouriño lamentou que o alcalde de Vigo, Abel Caballero, manteña unha “constante mentira”, asegurando que a bancada xa foi entregada ao club. “Por moito que o diga o alcalde, todos os días está a dicir que nola entregou. Non nos entregou absolutamente nada”, criticou.
“Non están en condicións para ser usadas”, e calcula que ata o 18 de xuño non se poderá facer uso delas. “Que motivo hai para enfrontar ao Celta cos seus abonados? Cal é o motivo real? Mercadotecnia política? Cal é? Non o entendemos”, engadiu.
Tamén criticou que o Celta non poderá usar Balaídos para certos actos de celebración do seu Centenario e que o Concello planee un concerto alí precisamente cando o Celta B quizá teña que xogar o ‘play off’. “Ponnos o concerto ese día e temos que protestar porque non están a apoiar ao Celta”, reivindicou, asegurando que quizá teñan que ir xogar a Pontevedra ou a Santiago.
Tamén criticou que o Concello non lles dese permiso para levar a cabo unha carreira por rúas céntricas da cidade, a pesar de que xa foron propostas dúas datas distintas. “Non sabemos moi ben por que”, indicou, asegurando que en Vigo son moitas as carreiras que levan a cabo.
Tras estas palabras, Abel Caballero foi preguntado en rolda de prensa, pero non contestou, aprazando a resposta a unha intervención posterior do concelleiro de Fomento, Javier Pardo. Este, asegurou que as obras que tiña que realizar o Concello na bancada de Marcador xa están finalizadas, coa cuberta instalada, a fontanaría e os baños. “Faltan as actuacións que ten que realizar o Celta e a liga de Fútbol Profesional”, asegurou.
