A Garda Civil abriu unha investigación para localizar a un individuo que, a punta de pistola, asaltou este domingo unha gasolineira no municipio pontevedrés do Porriño. Segundo informaron fontes da Comandancia, os feitos ocorreron sobre as 22.30 horas deste domingo, nunha estación de servizo situada na N-120, no Confurco. Un individuo que chegou a pé á gasolineira, coa cara tapada con pasamontañas, achegouse a unha empregada e, mostrándolle unha pistola, esixiulle o diñeiro da caixa.
A continuación, o atracador saíu correndo a pé, aínda que a Garda Civil non descarta que tivese algún cómplice esperando nun vehículo para fuxir. A pesar de que tanto a Garda Civil como as policías locais do Porriño e Ponteareas realizaron unha batida pola zona, o atracador non foi localizado nese momento, e abriuse unha investigación para dar co seu paradoiro.
