Un bombeiro do parque de Teis de Vigo resultou ferido por unha árbore nas últimas horas mentres atendía unha emerxencia na rúa da Maceiriña, polo que na actualidade atópase hospitalizado e con prognóstico estable dentro da gravidade. Tal como informou o goberno local, os bombeiros tiveron que intervir nas últimas 24 horas en máis de 50 incidencias provocadas polo temporal, sendo na súa maioría caídas de árbores e cableado na vía pública, así como desprazamentos de colectores.
Nun destes incidentes, un bombeiro resultou ferido por unha árbore, tendo que ser derivado a un centro hospitalario da cidade, onde continúa ingresado. A choiva e o vento das últimas horas tamén provocaron que o Concello suspendese as visitas teatralizadas ao cemiterio de Pereiró programadas para a fin de semana. Tamén celebrará o domingo 3 de decembro a ruta Camiño a Camiño programada para este domingo, día 5 de novembro. Ademais, suspéndense as actividades previstas en VigoZoo estes días.
Por outra banda, o goberno municipal abrirá esta tarde o pavillón do Carme, tanto o ximnasio como a piscina, así como a circulación na rúa do Carme e no primeiro tramo de Cesáreo González, que se pecharon este pasado xoves polas consecuencias do temporal. A actividade nestas instalacións retómase tras intervir na cuberta das mesmas, aínda que quedan pendentes máis traballos que se realizarán “proximamente”. Con todo, a actividade deportiva nas pistas de tenis de Samil quedou anulada.
