O Tribunal Supremo (TS) deu a razón a dous afectados polo Promotora Paseo Marítimo e ditou que un banco terá que pagarlles a total indemnización dunhas vivendas que non lles chegou a entregar no Porriño (Pontevedra) porque a empresa acabou disolta.

A empresa demandada tiña proxectado construír 147 vivendas que deberían adxudicarse aos compradores no ano 2008. Así, os adquirientes dos inmobles realizaron os pagos correspondentes no tempo establecido, pero as vivendas nunca foron entregadas porque a promotora se declarou en concurso de acredores en 2011.

No que respecta á empresa, non contratara garantía para protexer as cantidades afectadas, cuxo respaldo é obrigatorio por lei. Ante isto, os particulares presentaron varias demandas fronte á entidade bancaria que recibiu nas contas (na actualidade, Unicaja Banco S.A.), abertas a nome do promotor, o diñeiro dos compradores.

Así pois, segundo indicou nun comunicado o bufete O Defensor da túa Vivenda, que levou a defensa dos demandantes, o Supremo determinou nunha sentenza ditada o pasado 18 de outubro de 2021, que o banco debe pagar 91.637,16 euros, ao que hai que sumar os intereses legais desa cantidade desde a reclamación xudicial e as costas procesuais.

“SENTENZA PIONEIRA”

Unha das avogadas da entidade, Alejandra Parente, incidiu na importancia deste fallo, que evita “a perda de poder adquisitivo dos compradores” porque permite a acumulación de intereses e así os afectados perciben coa indemnización unha cantidade equivalente á que entregaron no seu momento ao promotor, máis os beneficios que lles xeraría esa contía.

A modo de exemplo, a letrada explicou que, tomando como referencia a cantidade de 1.000 euros, esta tería un valor moi inferior no 2020 que no 2008, “polo que os compradores non deben renunciar a rendementos” que lles xerarían as achegas que realizaron.