As familias da Escola de Educación Infantil Vila Laura de Vigo volveron concentrarse este venres ás portas do centro para reclamar a incorporación da terceira mestra de apoio, e lembraron que, 23 días despois do inicio do curso, esta demanda segue sen cubrirse. A ANPA volveu denunciar que a falta desta profesional obriga a recorrer ás especialistas de Pedagoxía Terapéutica (PT) e Audición e Linguaxe (AL), que teñen que detraer tempo da atención ao alumnado que precisa destes apoios. As familias lembraron tamén que o centro funciona porque “os seus profesionais fan un esforzo enorme todos os días”, pero advertiron de que “conseguir que un centro abra as súas portas e resolva cada incidencia non pode ser a medida para decidir se ten persoal suficiente”.

RECLAMAN UNHA TERCEIRA DOCENTE PARA DEZ AULAS

O centro conta con dez aulas e, atendendo ao criterio dun docente de apoio por cada tres unidades de Educación Infantil —e tendo en conta que o curso pasado contou con tres profesionais—, as familias reclaman a incorporación da terceira mestra. “Non estamos a pedir máis actividades, novas instalacións nin un privilexio. Estamos a pedir persoas para atender a persoas, persoas que teñen dous, tres, catro ou cinco anos”, remarcaron.