Catro traballadores resultaron feridos, un deles de gravidade, nunha explosión rexistrada este venres nunha canteira situada na parroquia de Atios, no Porriño. O accidente produciuse durante unha voadura controlada e obrigou a mobilizar un amplo dispositivo de emerxencias, incluído un helicóptero medicalizado.

O Centro Integrado de Atención ás Emerxencias do 112 tivo constancia do sucedido arredor das 13.10 horas, cando un particular contactou co servizo para solicitar asistencia sanitaria para varios operarios que sufriran feridas tras unha explosión nas instalacións.

Ata a canteira desprazáronse efectivos do 061, dos Bombeiros do Porriño, da Garda Civil, da Policía Local e de Protección Civil. Segundo a información facilitada polos servizos de emerxencias, os catro afectados estaban accesibles, polo que non foi necesario realizar labores de rescate para chegar ata eles.

O traballador que presentaba lesións de maior consideración é un home de 42 anos, identificado coas iniciais I.G.C., que foi trasladado no helicóptero medicalizado ata un centro hospitalario da Coruña.

Os outros tres afectados son tamén homes, con idades comprendidas entre os 49 e os 63 anos. Neste caso, foron evacuados por estrada ata o Hospital Álvaro Cunqueiro de Vigo.

Para atender o accidente, o 061 mobilizou o helicóptero medicalizado con base en Ourense, unha ambulancia de soporte vital avanzado, dúas ambulancias de soporte vital básico e un equipo de Atención Primaria.

A GARDA CIVIL INVESTIGA AS CAUSAS DA EXPLOSIÓN

As primeiras informacións da Garda Civil sitúan o accidente no transcurso dunha voadura controlada na canteira. A Benemérita abriu unha investigación para determinar as circunstancias nas que se produciu a explosión e esclarecer as causas que provocaron as lesións dos catro operarios.

O alcalde do Porriño, Alejandro Lorenzo, tamén se desprazou ata as instalacións despois de coñecer o sucedido. O rexedor sinalou que os traballadores estaban “estables” e que xa foran trasladados aos correspondentes centros hospitalarios, ao tempo que expresou o seu desexo de que evolucionen favorablemente.

Lorenzo indicou ademais que o Concello queda á disposición tanto da Garda Civil, responsable da investigación, como da empresa propietaria da canteira para colaborar no que resulte necesario tras o accidente.