As dúas grandes praias urbanas de Vigo, Samil e O Vao, adoptarán este verán un sistema de cintas por cores que establecerán cuadrículas e camiños para que a afluencia de persoas se produza de maneira “completamente segura” e coa debida distancia social de dous metros.
O alcalde da cidade, Abel Caballero, presentou este sábado ante os medios esta iniciativa que se implementará a partir do 15 de xuño, que é cando empeza “a tempada de verán”.
O sistema de cintas instalarase nas praias de Samil e O Vao, que suman case 4 quilómetros en total e que reciben durante todo o día “moita afluencia de xente”, ao redor de 15.000 persoas, da que unha gran porcentaxe provén “doutros lugares de España”, lembrou o rexedor.
“E que queremos? Pois en Vigo queremos praias completamente seguras sanitariamente e iso chámase, primeiro, distancia social“, agregou Caballero, para xustificar a medida adoptada.
Así, os dous principais areais da cidade armaranse de cintas de plástico por cores, “absolutamente inocuo medioambientalmente e non produce o máis mínimo dano aos bañistas”, que utilizarán a cor vermella para demarcar parcelas de 8 por 8 metros nas que poderán permanecer ata seis persoas.
Para entrar e saír da súa cuadrícula, as persoas deberán facelo por un tramo branco que terán estas cintas. Unha vez fóra, atoparanse cunha intersección verde na que poderán baixar ata a auga ou subir ao paseo. “É sinxelo”, asegurou o alcalde.
En cada entrada á praia haberá unha desas franxas verdes que permitirán a subida ou a baixada. Ademais, xunto á beira será “a zona de estancia”, na que as familias poderán pasear, bañarse e xogar. Alí, tal e como apuntou Abel Caballero, o mecanismo de control será “a responsabilidade social”.
POLICÍAS E SOCORRISTAS
En calquera caso, o alcalde confirmou que “en todas as praias de Vigo” haberá policías e socorristas “como todos os veráns”, que serán os encargados de velar pola seguridade e ver “se hai algún sitio onde se excede o número de persoas”.
De forma complementaria a este sistema, o Concello contratará a traballadores que se encargará de retirar as cintas a última hora do día para recolocalas pola mañá. Así, pola noite, poderán acceder á praia os vehículos coas pas para limpar e tamizar a area.
“Pola noite quítanse as tiras, límpase a praia e á mañá seguinte vólvense pór”, resumiu Caballero, quen con todo evitou fixar unha hora para estes traballos porque “depende do día do ano”. E é que o solpor pode chegar a variar unha hora entre xuño e setembro.
ZONAS VERDES
Nas zonas verdes das que dispoñen tanto Samil como O Vao, o Concello debuxará sobre a herba cuadrículas tamén dunha superficie de 8 por 8 con “pintura biodegradable, a mesma que se utiliza nos campos de fútbol”, segundo afirmou o rexedor.
Así mesmo, o Consistorio retirará todas as mesas de pedra de Samil para evitar que as familias se instalen nelas a celebrar comidas. Por parte dos quioscos de praia, Caballero garantiu que “volverá habelos”, pero cun sistema de separación entre as cadeiras.
O resto de areais do termo municipal vigués, que roldan o medio cento, “terán o seu propio control” por parte da Policía Local e os socorristas.
Finalmente, o alcalde de Vigo descartou establecer un límite de horarios para acceder aos areais e avanzou que o Concello fomentará a rotación de persoas ao longo do día.
