A comunidade educativa da EEI Vila Laura de Vigo volveu mobilizarse este venres, e xa van cinco, contra a Xunta, para esixirlle á Consellería de Educación que “cumpra coa dotación docente que ela mesma aprobou” e incorpore outra mestra de educación infantil que falta desde o inicio de curso: “12 non son 13”. Profesorado, pais, nais e alumnado volveron concentrarse á entrada do centro para esixir “que se cumpra co catálogo” ante a “falta” dunha mestra. Por iso, “suspenderon” a Xunta cun “cero”, xa que “12 non son 13”.

“Non queremos volver o próximo venres. Pero volveremos. Un venres, e outro, e outro. Todos os que fagan falta”, reivindicaron. “Non reclamamos unha especialista nin un recurso extraordinario. Reclamamos unha mestra de educación infantil que fai apoio educativo ordinario nas aulas e participaría, xunto co resto do profesorado, na organización das gardas e na cobertura das substitucións e ausencias. Ese posto estaba cuberto o curso pasado. Este curso non o está”, explicaron.