O BNG fixo este venres en Vigo un chamamento á cidadanía que lle dera o seu apoio nas últimas eleccións autonómicas, nas que foi a primeira forza na cidade olívica, para volver contar con representación no Congreso pola provincia de Pontevedra, e insistiu en que só unha maior presenza do BNG nas Cortes garante a defensa dos intereses dos vigueses, dos galegos e das maiorías sociais.

Así o trasladou o deputado Néstor Rego, que participou nun almorzo informativo con medios, no que tamén estiveron a responsábel local do BNG, Carmela González, e o voceiro municipal nacionalista, Xabier Pérez Igrexas. Rego fixo balance “con satisfacción e orgullo” dos logros acadados en Madrid e do cumprimento dos compromisos asumidos, aínda que recoñeceu que quedaron cuestións por culminar, como a implantación das cercanías ferroviarias. En todo caso, o deputado do BNG sinalou que “cómpre preguntarse” que fixeron o resto de representantes pola provincia de Pontevedra e por Galicia, cando un único deputado nacionalista presentou máis iniciativas e impulsou máis medidas ca eles, con máis representantes.

Segundo Rego, “hai moita potencialidade” en Vigo e na provincia para que o 29N “poida haber un cambio importante en favor dos intereses de Galicia”, e insistiu en que o BNG pode gabarse de ter cumprido os seus principais compromisos no Congreso: defender os intereses de Galicia e das clases populares, impulsar “políticas sociais e transformadoras” e “ser muro de contención fronte á involución do bloque reaccionario do PP e Vox”.

“HAI ESPERANZA”

Tras afirmar que o BNG é a única forza da esquerda que sobe “e a única que vai subir en Galicia”, fixo un chamamento ás persoas que, nas últimas eleccións xerais, confiaron noutros partidos da esquerda “que prometeron políticas avanzadas” e non cumpriron. “Esas persoas hoxe están desilusionadas, eses partidos quedaron a medio gas, e a decepción, ás veces, pode levar á inacción e a ficar na casa, pero non é a solución”, advertiu. “En Galicia hai unha alternativa, que é o BNG. Ficar na casa é o que queren PP e Vox, non lles fagamos ese favor. Hai esperanza, hai alternativa”, proclamou.

O RETROCESO OU “MÁIS DO MESMO”

Pola súa banda, o voceiro municipal do BNG, Xabier Pérez Igrexas, tras gabarlle o “enorme e coherente” traballo da formación nacionalista nas Cortes, “coas mans libres e sen subordinacións”, advertiu de que os vigueses e galegos se xogan moito o 29 de novembro.

Así, apelou ao voto que confiou nos nacionalistas nas últimas eleccións galegas, para recuperar a representación do BNG pola provincia no Congreso (en 2023 quedaron a 6.000 votos), e evitar “o retroceso ou máis do mesmo”. “Os vigueses poden ter a certeza de que a papeleta do BNG vale o triplo: é a única que fai valer os intereses de Vigo e Galicia, a que vai pular por políticas progresistas e a que vai ser garantía de pechar o paso á ameaza reaccionaria e ao fascismo“, remarcou.

Pérez Igrexas subliñou que “a forza de Vigo vai ser determinante” nos comicios do 29N, e insistiu en que os vigueses que xa confiaron no BNG en febreiro de 2024 teñen agora “a oportunidade de usar esa forza para lograr un BNG cun peso máis decisivo”.