Desde a plataforma Grupos de Vigo en Loita informan do peche do espazo Vigosónico, que alberga salas de ensaio musicais, a partir do vindeiro 28 de febreiro e advirten de que non reabrirá ata que estea adxudicado o servizo. O colectivo, que abrangue aos usuarios dos locais e músicos, denuncian que “poden pasar meses ata que volva abrir as portas”.

Tamén sinalan que trala manifestación do pasado 5 de febreiro, o Concello anunciou a licitación por un ano cun valor de 85.000 euros. Unha nova que foi acollida positivamente polo colectivo, que agora lamenta que non se fixera mención ao peche indefinido.

“É un escándalo e unha burla que Vigosónico peche de novo xusto despois de anunciar a súa continuidade”, afirman. Ademais, a plataforma desconfía das intencións do goberno municipal e esixen que o Concello reabra inmediatamente este espazo. “A última vez que pechou indefinidamente foi coa excusa da pandemia, pero resultou ser un peche encuberto que non podemos reverter ata dous anos despois”, conclúen.