O alcalde de Tui, Carlos Vázquez Padín, quedou absolto dun delito leve de ameazas, do que fóra condenado o pasado mes de decembro polo Xulgado de Instrución nº3 de Tui tras a denuncia presentada polo técnico do club Kaiak Tudense, Esteban Alonso.

En rolda de prensa, o rexedor amosou a “súa satisfacción a nivel político e persoal” logo de que a sección 4ª da Audiencia Provincial de Pontevedra arquivara o caso. Na súa sentenza a maxistrada estima o recurso presentado polo alcalde de Tui contra a sentenza do xulgado de instrución, absolvéndoo do delito. Contra esta resolución non cabe recurso.

“Pola miña honra persoal valía a pena recorrer e agora faise xustiza”, dixo. Ademais, apuntou que na sentenza da Audiencia se entende que “en primeira instancia non se aplica o principio de In dubio pro reo, nin o de mínima intervención ao tempo que non hai axuste ao tipo penal”.

O xulgado de Instrucción nº3 de Tui condenara o pasado decembro ao rexedor tudense a pagar 450 euros de multa por ameazar ao director deportivo do Club Kaiak Tudense con “airear os seus trapos sucios”, despois de que este afirmase nun medio de comunicación que Tui “non necesita un figurín”, en alusión ao alcalde.

A xuíza de primeira instancia ditou sentenza condenatoria, por considerar probado que Vázquez Padín tivo unha actitude “claramente amonestadora” cara a este particular, e lembráballe que, como cargo público, está “sometido á libre crítica”.