Inicio Blog Páxina 1858

Ciudadanos lamenta a actitude “temeraria” do alcalde ao non atender os bombeiros de Vigo

redacción
-
0
Ciudadanos lamenta a actitude “temeraria” do alcalde ao non atender os bombeiros de Vigo

Ciudadanos criticou este luns a actitude “absolutamente temeraria” do alcalde de Vigo, Abel Caballero, por non reunirse co colectivo de bombeiros da cidade (en folga desde mediados de agosto por falta de persoal) e escoitar as súas reivindicacións e propostas para mellorar o servizo.

Así o trasladou a candidata ao Congreso pola provincia de Pontevedra, Beatriz Piñeiro, tras manter unha reunión con representantes de bombeiros de Vigo. “Denunciamos a actitude absolutamente temeraria do alcalde ante unha situación que non quere afrontar e non quere resolver”, sinalou.

A candidata fixo alusión ao decreto do goberno local que suspende os descansos dos bombeiros e impón facer horas extras para paliar a falta de efectivos, un decreto “que non era legal”, á luz de dúas sentenzas recentes dun xulgado vigués que o anularon.

Segundo incidiu Beatriz Piñeiro, o que pretenden os bombeiros é “poder dar un servizo de calidade”, e o rexedor “nin sequera quere recibilos”, a pesar de que se trata dun departamento “básico” para a seguridade dos cidadáns.

Por iso, instou ao goberno de Abel Caballero a non recorrer a sentenza que anularon o decreto e a reunirse cos bombeiros para escoitar as súas demandas.

Caballero anuncia que o estudo sobre o abastecemento de auga está “desbloqueado”

E.P.
-
0
Caballero anuncia que o estudo sobre o abastecemento de auga está “desbloqueado”

O alcalde de Vigo, Abel Caballero, avanzou que o estudo que permitirá alcanzar unha “solución” para o abastecemento de auga da área de Vigo está “desbloqueado”.

Nunha rolda de prensa celebrada en Vigo, o rexedor recalcou que a pluviosidade nas zonas de recollida de auga é “suficiente” para abastecer a cidade olívica e apuntou que o problema se atopa no seu almacenamento. Así, detallou que este mércores se puxo en contacto co secretario de Estado de Medio Ambiente, Hugo Morán, responsable da licitación do estudo.

Precisamente esta semana a conselleira de Infraestruturas e Mobilidade, Ethel Vázquez, lembrou que a Xunta e o Concello esperan desde hai meses os informes necesarios para asinar o convenio de colaboración co Ministerio de Transición Ecolóxica que permita realizar o estudo correspondente.

Mentres, o alcalde acusou a Administración autonómica de non actuar neste sentido “durante seis anos” a pesar de que, segundo asegurou, o municipio da urbe galega expúxolle a importancia de que se garantise “un transvasamento de emerxencia” do que poder dispor en caso de necesidade. Nesta liña, chamou á Xunta a non “pór problemas” ao desenvolvemento do proxecto.

Así mesmo, puxo en valor que o Goberno central asumise o “compromiso” da realización do estudo e que este se vaia a levar a cabo a pesar de que non se puideron aprobar os Orzamentos Xerais do Estado (PGE).

Vídeo: protestas contra a caza do raposo

redacción
-
1
Vídeo: protestas contra a caza do raposo

Un cento de activistas concentráronse este sábado para protestar contra a caza do raposo no marco do campionato provincial que se celebra en Cerdedo-Cotobade, á par que o coruñés en Irixoa, Monfero, Vilarmaior, Pontedeume e Cabanas.

Baixo o lema “A morte non é un deporte”, os animalistas concentráronse na zona de acceso dos cazadores, que foron recibidos con berros e unha sonora pitada e bucinazos, protexidos por axentes da Garda Civil, que levantaron da estrada os manifestantes ao paso dos participantes no campionato cara o chamado “punto limpo”, onde se depositan os cadáveres de centos de raposos.

As protestas non só veñen das organizacións animalistas e de cidadáns indignados. Partidos como En Marea ou Colexio Oficial de Biólogos de Galicia, que critican duramente ao goberno galego pola autorización e patrocinio destas matanzas masivas de raposos e pola falta de control.

Porriño, Redondela e Porriño, grandes aspirantes ao título “Cidades da infancia” de Unicef

redacción
-
0
Porriño, Redondela e Porriño, grandes aspirantes ao título “Cidades da infancia” de Unicef

Ourense, Tomiño, Redondela, O Porriño, Moeche, Cabanas, Carnota e Teo. Noutras palabras: os oito municipios galegos que poden chegar a ser considerados pola Unicef como “Cidades Amigas da Infancia”. Tres deles, Porriño, Redondela e Porriño, da nosa provincia.

O resultado do concurso non se saberá ata finais de outubro. Esta iniciativa, xa consolidada, naceu para promover o desenvolvemento das políticas en favor da infancia. As localidades aspirantes deben demostrar a boa situación das crianzas na súa zona, elaborar un plan de infancia e promover organismos que amparen aos máis pequenos.

 

Porto de Vigo formaliza a extinción da concesión de Vulcano

redacción
-
0
Porto de Vigo formaliza a extinción da concesión de Vulcano

O consello de administración do Porto de Vigo aprobou de modo definitivo a extinción da concesión administrativa das antiga Factorías Vulcano (agora Estaleiros San Enrique), co único voto en contra da CIG, e o presidente da institución, Jesús Vázquez Almuiña, previu que tras sacala a concurso a empresa adxudicataria poida operar na zona en “seis ou oito meses”.

Na rolda de prensa posterior á reunión mensual do consello de administración do Porto, Vázquez Almuiña indicou que se procedeu a formalizar a extinción da concesión. Precisamente, o pasado mes de abril aprobouse a incoación do expediente co voto en contra de CIG e a abstención da alcaldesa de Redondela nunha sesión á que non asistiu o rexedor vigués, Abel Caballero.

A este respecto, o presidente da institución lembrou que esta situación se produciu despois de que o Tribunal de Conflitos de Xurisdición declarase que correspondía ao Porto de Vigo tramitar e resolver o expediente de extinción da concesión do antigo estaleiro.

Así as cousas, apostou por que un “un proxecto sólido” vinculado ao sector naval poida asentarse nos antigos terreos das antigas Factorías Vulcano, onde augurou que poderá operar unha empresa nun prazo de “seis ou oito meses” tras extinguirse a concesión administrativa e convocarse un novo concurso para a súa adxudicación.

Deste xeito, avanzou que a próxima semana se comunicará a extinción ao estaleiro en mans do que se atopa a concepción e que disporá dun prazo dun mes para abandonar o lugar, aínda que poderá solicitar unha autorización para “realizar actividade naval” durante os meses previos á finalización do concurso para a nova adxudicación. Tamén avanzou que “nos próximos días” manterase un encontro con esta empresa, Marina Meridional.

Neste momento, sinalou que o Porto traballa na tramitación dos pregos de condicións dunha nova concesión que se sacará a concurso nun prazo aproximado de dous meses e confiou en que a empresa adxudicataria poida operar na zona en “seis ou oito meses”.

PROXECTO “SÓLIDO”

En todo caso, Vázquez Almuiña recalcou que “se vai dar a opción de que un proxecto naval poida asentarse” nestes terreos, aínda que se requirirá que sexa “sólido” e “estable”, así como que “teña compromiso de contratación, de investimento e de actividade portuaria”. “Imos dar a opción de que un proxecto naval poida desenvolverse nesa concesión”, afirmou o presidente, que avanzou que as condicións se analizarán nos próximos meses e o prego someterase á aprobación do consello de administración.

Abel Caballero pide rebaixar as restricións en Vigo: “Non poden tratar a todas as cidades igual”

E.P.
-
0
Abel Caballero pide rebaixar as restricións en Vigo: “Non poden tratar a todas as cidades igual”

O alcalde de Vigo, Abel Caballero, criticou este mércores que a Xunta manteña restricións xenéricas sen ter en conta o nivel de incidencia da pandemia por cidades ou áreas concretas, e insistiu en que, coa actual situación epidemiolóxica, a cidade olívica podería celebrar San Xoán con fogueiras en espazos públicos “perfectamente”, aínda que mantendo certas medidas de precaución polo que pediu “relaxar” esas restricións.

Nunha rolda de prensa, o rexedor apuntou que a incidencia acumulada a 14 días na cidade é de 29,7, mentres que a incidencia a 7 días é de 14,7, o que reflicte “unha boa situación”. De feito, subliñou que Vigo é a cidade galega con menor incidencia da Covid-19 a 7 días.

Nese contexto, volveu a referirse a as restricións vixentes que impiden a realización de fogueiras de San Xoán en espazos públicos. “Non entendo que a Xunta prohiba as fogueiras. Poderíanse facer perfectamente, con control e límites de aforamento, pero prohibíunolo. E tamén prohibe, pola vía dos feitos, a apertura das piscinas de Samil”, lamentou.

Abel Caballero censurou que a administración galega “pon tal nivel de control, coma se houbese incidencia de 100”, e advertiu de que “a Xunta ten que diferenciar, non pode tratar a todas as cidades igual”.

Segundo o alcalde, Vigo “non pode ter medidas tan restritivas” cando está a ter un “bo comportamento”. “Non digo que isto sexa barra libre, pero téñense que relaxar un pouco as medidas, dar máis marxe á hostalaría e as actividades lúdicas”, proclamou.

Caballero, que anunciou un dispositivo reforzado de Policía Local para incrementar a vixilancia esta noite, reiterou o seu “desacordo con que a Xunta prohiba as fogueiras en Vigo” e engadiu que “se poden facer con seguridade, como se fixo a Cabalgata de Reyes estática, pero a Xunta aplica normas xenéricas e non analiza como está cada área e cada ámbito”.

A área de Vigo detecta un cuarto do total de novos contaxiados en Galicia

redacción
-
0
A área de Vigo detecta un cuarto do total de novos contaxiados en Galicia

A presión hospitalaria que deixa a pandemia da covid-19 en Galicia mantense este sábado sen variacións, con 167 pacientes. Con todo, os novos contaxios detectados nun día por calquera tipo de probas aumentaron ata os 209, o que implica unha subida de 63 máis con respecto aos da xornada anterior. Ademais, isto traduciuse en que os casos activos subiron por segundo día consecutivo. Segundo os datos que ofrece este sábado a Consellería de Sanidade, solicitados ata as 18,00 do venres, hai 2.286 pacientes de coronavirus, 93 máis que 24 horas atrás.

DATOS DE VIGO

No que respecta aos ingresados, concretamente na área de Vigo a situación mantense estable: isto é, os hospitalizados en unidades convencionais seguen nos 28 (sen cambios), e os que se atopan en UCI baixaron a cinco (-1). 

En canto aos casos activos de covid-19, Vigo, que se mantén como área con máis casos activos, suma outros 22 ata situarse nos 625. Dos novos positivos, a área de Vigo detectou ao redor dun cuarto deles, un total de 53; seguida da da Coruña-Cee, con 44.

PCR E TAXA DE POSITIVIDADE

De acordo cos datos de Sanidade deste sábado, en Galicia realizáronse 1.905.426 PCR en total, o que supón 7.098 probas diagnósticas ao longo das últimas 24 horas –un centenar máis que as feitas a xornada pasada–. En canto á taxa de positividade, repunta ata o 3,1% pero segue por baixo do 5% que a Organización Mundial da Saúde (OMS) fixa para dar por controlada a pandemia.

VÍTIMAS E CURADOS

Desde o inicio da pandemia faleceron en Galicia 2.368 persoas diagnosticadas de covid-19, despois de notificar a Consellería de Sanidade este venres a morte dunha septuaxenaria. Así mesmo, ata o momento curáronse deste coronavirus en Galicia un total de 113.800 pacientes. Isto permite deducir que nas últimas 24 horas recibiron a alta outras 112 persoas.

Seguen subindo os casos de Covid na área de Vigo

redacción
-
0
Seguen subindo os casos de Covid na área de Vigo

Galicia detectou nas últimas 24 horas 293 novos positivos por coronavirus e os casos activos incrementáronse en 55, ata situarse en 4.137, de acordo cos datos difundidos este sábado pola Consellería de Sanidade, tomados na tarde do venres. Tamén en Vigo seguen subindo, aínda que a un ritmo inferior ao dos últimos días, con dez novos casos.

O parte de hoxe recolle un ascenso dos casos activos por encima dos 4.000, unha repunta dos novos positivos detectados con respecto á xornada anterior e tamén unha subida nos pacientes curados, que alcanzan os 13.438 –238 máis que o venres–.

Con todo, tras o catro mortes comunicadas na xornada do venres, o parte de Sanidade non reflicte ningún novo falecemento en Galicia vinculado coa COVID-19, polo que a cifra mantense en 656 desde que comezou a pandemia.

Por áreas sanitarias, o maior incremento no número de casos activos é o de Pontevedra, que pasa de 279 a 308 casos activos –29 máis–, mentres que a que máis pacientes ten segue sendo a da Coruña, con 1.446, aínda que só sobe nun con respecto ao día anterior.

En Vigo, pola súa banda, aumentan en 10 os casos activos, de 327 a 337, e en Ourense hai cinco máis –de 412 a 417–. En área de Santiago e A Barbanza rexistra 677 casos activos, catro máis que na xornada anterior e a de Ferrol é a única que experimenta un descenso, dous casos menos, ata 148.

O parte dese venres indica tamén que se realizaron un total de 359.055 probas PCR en Galicia ata o momento, cifra que supera en 4.782 á de onte.

Efectivos da UME desenvolverán este mércores tarefas de desinfección

E.P.
-
0
Efectivos da UME desenvolverán este mércores tarefas de desinfección

A Unidade Militar de Emerxencias (UME) proseguirá durante a xornada deste mércores coas súas tarefas de desinfección en Galicia, de forma que o centenar de efectivos despregados nesta comunidade levarán a cabo os labores segundo informa a Delegación do Goberno en Galicia.

No caso de Vigo, os traballos darán comezo ao redor das 10 horas e afectarán os hospitais Álvaro Cunqueiro e Meixoeiro, estación de autobuses, as dúas estacións de tren, contornas de diversos centros de saúde, albergues e grandes superficies comerciais de alimentación.

DESPREGAMENTO DE EFECTIVOS

En Vigo, o despregamento farano con 50 militares e 16 vehículos, os mesmos que o martes traballaron en Pontevedra, na contorna de estación de autobuses, praza de Galicia, estación do tren, Hospital Provincial, ambulatorio Virxen da Peregrina, Hospital Montecelo, Comisaría de Policía, Hospital Miguel Domínguez e centro de saúde da Parda.

Detido en Vigo por ameazar a clientes e traballadores de varios bares, e tentar agredir a axentes da Policía

E.P.
-
0
Detido en Vigo por ameazar a clientes e traballadores de varios bares, e tentar agredir a axentes da Policía

Axentes da Policía Local de Vigo detiveron a pasada fin de semana un home, A.E., de 32 anos de idade, por ameazar e molestar os clientes e traballadores de varios bares, e por tentar agredir os funcionarios.

Segundo informaron fontes policiais, os feitos ocorreron na tarde do sábado, cando o 092 recibiu un aviso para desprazarse a unha cafetaría da Avenida de Fragoso, debido a que un home estaba a se comportar de modo agresivo e causando danos no local.

Unha vez no lugar, os axentes entrevistáronse co seu responsable, quen relatou que un home estivera no seu establecemento con actitude ameazante cara a el e cara aos clientes, e que rompera un vaso e unha copa.

O sospeitoso marchara do local e entrara noutro bar próximo, onde foi localizado e identificado pola Policía. Aínda que abandonou o lugar, só media hora despois outra dotación do 092 recibiu un novo aviso sobre a presenza dun home ameazando a camareira doutro establecemento.

A traballadora identificou o responsable das ameazas, ao que vira implicado no suceso anterior, e un dos clientes do local mostrou aos axentes un vídeo no que se vía ao sospeitoso utilizando un cinto, a modo de látigo, e golpeando o chan e o mobiliario do bar, mentres profería ameazas.

Novamente, tomáronse os datos do home e, cando a patrulla se dispuña a marcharse crendo que o sospeitoso marchara e restableceuse a calma, os axentes escoitaron berros e viron a A.E. entrar noutra cafetaría e ameazar a camareira.

Cando se achegaron a el para instarlle a que se marchase, o mozo tentou agredir os policías, polo que foi detido por un suposto delito de atentado a axentes da autoridade. Ademais, tramitouse unha sanción por infracción da lei de estranxeiría, ao ser este de orixe marroquí e non notificar o cambio de domicilio que figura no permiso de residencia.

1...1.8571.8581.859...2.070Páxina 1.858 de 2.070

HOXE EN GALICIA

Loading RSS Feed

Xornal de Vigo é o primeiro gran xornal dixital en galego de Vigo e a súa área metropolitana

SÍGUENOS

© Xornal de Vigo - Xurimaru Servizos de Comunicación 2010 S.L.