​Hai uns días, a Xunta de Galicia modificou decenas de toponímicos nas catro provincias, un axuste necesario pero que ás veces queda na superficie da historia urbana. En Vigo, resulta especialmente chamativo o caso dese barrio, outrora campo aberto, situado estratexicamente entre o Calvario, San Roque, Lavadores e a antiga estación de autobuses. Co crecemento das últimas décadas, a zona consolidouse coa apertura da avenida Gregorio Espino e a posterior construción do ambulatorio.

​Popularmente, a zona denominouse “La Doblada”, unha definición meramente circunstancial e descritiva que carece dunha verdadeira raíz toponímica. O colmo da falta de rigor cultural ocorreu cando, ao inaugurarse o ambulatorio, bautizouse oficialmente con ese nome en castelán. Tiveron que pasar case 30 anos para que a administración o corrixise pola forma galega, “A Doblada”.

​Porén, esta corrección ortográfica no oculta a escasa visión dos responsables da Xunta de Galicia. Foron incapaces de bautizar este centro sanitario co nome de algún médico que realmente deixase unha pegada na vida social e sanitaria da cidade.

​Unha elección de xustiza histórica tería sido a de Eugenio Arbones Castellanzuelo. Eminente médico, coñecido como o “médico dos pobres” polo seu incansable labor social, e deputado socialista, Arbones representaba a excelencia profesional unida ao compromiso ético. O seu tráxico final, fusilado polos sublevados en 1936 nas tapias de Pereiró, deixou un baleiro inmenso no Vigo que el tanto defendeu.

​Manter un nome tan baleiro de contido como “A Doblada” para un edificio de servizo público é, en definitiva, unha oportunidade perdida para honrar a memoria de quen, como Arbones, entregaron a súa vida á saúde e á liberdade dos seus veciños.