O documental “Falando de Memoria” consta de 15 microreportaxes que queren ser unha homenaxe aos homes e mulleres que sufriron cárcere, rapina, tortura, exilio ou morte por defenderen as liberdades públicas, a democracia e a República defronte o golpe de estado de xullo de 1936 e o fascismo.

“Este documento audiovisual é imprescindíbel para calquera sociedade democrática. Necesitamos  manter viva a lembranza das represariadas contra o esquecemento, para alumarmos un tempo histórico que ficou agochado e silenciado premeditadamente durante a longa noite de pedra da ditadura franquista”, explicou Cristóbal López, realizador do documental.

“O documental levanos por 15 lugares de memoria de Vigo e de parte da súa bisbarra. Un traballo de cartagrofiado da brutal represión que sufriu a poboación viguesa polo mero feito de ser demócrata” apuntou Celso Lopez Pazos, presidente da Asemblea Republicana de Vigo. 

Grazas a colaboración económica da Deputación de Pontevedra, 300 pens drive cos 15 microreportaxes que compoñen documental serán distribuidos a colexios, bibliotecas e ao tecido asociativo en xeral da comarca de Vigo.