Veciños de Mos concentráronse ante a sede do Celta contra a “vertedura contaminante” da cidade deportiva do clube, Afouteza. A iniciativa, convocada por Ecoloxistas en Acción e a plataforma A auga é vida, está motivada polas “graves consecuencias” que pode xerar a “continuidade desa vertedura ilegal”, xa que de alcanzar e contaminar as captacións das traídas, os pozos serían clausurados.

Así o explicou Ecoloxistas en Acción nun comunicado no que detallaron que entregaron na sede das Celta botellas con auga do monte de Tameiga e unha garrafa con auga residual da vertedura de Afoureza. O obxectivo, puntualizaron, é visibilizar a “grave ameaza” que é a achega de auga para os mananciais que abastecen de auga de boca a miles de familias en Mos.

Ante a sede do Celta leron un manifesto no que pediron respecto para os veciños e reclamaron que poñan fin a esa “ameaza ao futuro das súas comunidades”. Ademais, fixeron un chamamento ao celtismo para que “censure” este tipo de “prácticas irresponsables” co ambiente e a saúde dos veciños de Mos.