O Sergas non informa do que acontecerá o próximo 15 de xaneiro cando remate a substitución por vacacións dun dos tres médicos do PAC da Cañiza.

A solución aportada polo ente autonómico, dende o pasado 2 de xaneiro, foi a de asignar 2 horas durante 2 días semanais un médico para cubrir de xeito provisional o consultorio de Valeixe (A Cañiza) logo das queixas dos veciños cando o Sergas pechou o consultorio durante catro meses sen cubrir a praza do anterior facultativo.

A veciñanza sinala que a solución aportada polo Sergas non deixa de ser un parche insuficiente dado que actualmente o prazo de consulta é de 11 días de agarda para unha carteira de 700 pacientes, maioritariamente xente de avanzada idade.

O actual médico substituto atende unha media de 40 pacientes nas dúas horas de consulta extendendo o seu horario. Un servizo insuficiente para cubrir a demanda actual e que se verá incrementada logo de que o próximo día 15 de xaneiro o Sergas amortice esta praza.