Máis de 200 persoas concentráronse na tarde deste martes en Vigo para reclamar “xustiza” para Déborah Fernández-Cervera, a moza que apareceu sen vida en 2002 nunha cuneta do Rosal uns días despois da súa desaparición.

Antes do inicio da mobilización, que tivo lugar ás 20,00 horas ante o Museo Marco, a irmá da nova, Rosa Fernández-Cervera, sinalou que se busca mostrar que “unha sociedade enteira” busca “xustiza” para Déborah porque “non se merece que un asasino siga na rúa”.

“Isto é un berro de desaparición. Vemos que quedan catro meses para a prescrición do delito e vemos que a xustiza sen facer o que corresponde”, afirmou á vez que acusou á Fiscalía de “non mover un dedo”. Tamén lembrou que os seus avogados presentaron un informe “demoledor” de 44 páxinas no xulgado, pero “séguese sen respostas”.

“Hai un asasino entre nós e négome a que outra familia teña que sufrir o calvario que sufrimos nós“, aseverou Fernández-Cervera, que lembrou que dous informes periciais apuntan cara a un mesmo sospeitoso e volveu a criticar as actuacións policiais e xudiciais no caso.

Durante o acto, organizado por Feminismo Unitario de Vigo, a nai de Déborah, Rosa Neira, pediu “xustiza” para a súa filla e “unha chea de homes e mulleres” desaparecidos en Galicia, como María José Arcos e Sonia Igrexas.

MANIFESTO

Adicionalmente, leuse un manifesto para pedir que “se faga xustiza” e a morte de Déborah “non quede impune”, para o que se remarcou que “é necesario citar ao principal sospeitoso” para declarar. Así, advertiuse de que, “se non se ten xustiza agora, logo será tarde” e a “inxustiza” quedará ligada ao nome de Déborah.

Así, o manifesto remarcou que “non se pode alongar máis este paripé” no que “dúas investigacións policiais apuntan a un mesmo sospeitoso” que non foi chamado a declarar  e que se puxo o foco na súa pertenza a unha familia con peso na cidade.