A Confederación Hidrográfica Miño-Sil (CHMS) emitiu un informe desfavorable sobre as instalacións que o Real Club Celta de Vigo abriu no Concello de Mos. O documento da Confederación recolle a intención de construír unha serie de infraestruturas propiedade da entidade deportiva realizadas en chan rústico.
O Concello de Mos pedira un informe á CHMS para levar adiante as obras. Dito informe daría o visto bo ou desfavorable segundo a lexislación vixente en materia de recursos hídricos.
Non obstante, a propia Confederación reporta no seu informe do 25 de novembro de 2020 que pediu ao consistorio de Mos unha serie de documentos relativos aos recursos hídricos da zona. Nesa mesma petición a CHMS solicitaba tamén información sobre a capacidade de recollida de augas residuais nas instalacións deportivas.
Os documentos solicitados pola CHMS non foron enviados segundo di o escrito emitido desde a mesma. Desta maneira, a Confederación Hidrográfica emitiu un informe desfavorable en relación ás obras e construción da cidade deportiva do Celta en Mos.
En tal caso, se o concello mosense solicitase novos informes ao organismo hidrográfico, deberá aportar toda a documentación requerida polo mesmo, tal e como lle indican desde a consellería técnica da Confederación Hidrográfica.
