O Goberno portugués agradeceu o ofrecemento da Xunta para tratar a pacientes de coronavirus do país luso, pero sinala que por agora non necesita derivar a afectados.

Nun comunicado este sábado, o Executivo galego informa de que Portugal, a través do coordinador rexional norte para a resposta de UCI, remitiu unha carta ao conselleiro de Sanidade, Julio García Comesaña, na que agradece a súa dispoñibilidade.

Aínda que o coordinador portugués fai mención a que a rexión norte continúa cunha gran presión asistencial, polo momento son capaces de responder as necesidades actuais cos seus propios dispositivos asistenciais. Con todo, non descartan recorrer a esta axuda se é necesario no futuro.

Este mesmo sábado, o director xeral de Asistencia Sanitaria do Sergas, Jorge Aboal, asegurou –nunha entrevista coa Radio Galega, que recolle Europa Press– que hai unhas 30 camas dispoñibles no Chuvi para atender en “un primeiro momento” a pacientes que poida derivar Portugal en caso de ser necesario.