O goteo de pacientes con covid-19 hospitalizados non cesa en Galicia, que suma outros 50 ingresados máis noutra xornada cos contaxios detectados por enriba dos 1.300 (1.225 por PCR), a taxa de positividade roldando o 10% e os casos activos marcando novo teito da pandemia, segundo datos da Consellería de Sanidade.

Deste xeito, a presión sobre os hospitais galegos mantense en aumento cunha xornada na que subiu a 1.362 o número total de pacientes ingresados, 50 máis que 24 horas antes. Tamén se incrementan as persoas que requiren coidados intensivos, que son xa 232, catro máis que o día anterior.

En Vigo subiron os ingresados, aínda que de forma mínima ata os 175 (+1). Destas persoas, 21 requiren coidados intensivos (sen cambios). Ademais, nesta área superáronse os 200 contaxios detectados nun día cos 277 notificados (+26).