O ministro de Sanidade, Salvador Illa, puxo este mércores en valor o papel de organismos internacionais, como a Organización Mundial da Saúde (OMS) ou o Centro Europeo de Prevención e Control de Enfermidades (ECDC), na loita contra a pandemia de COVID-19, e advertiu de que a decisión de “países que comunicaron que se van dar de baixa” é un “claro erro”.
Así o trasladou na súa intervención durante un acto electoral celebrado en Vigo, de apoio ao candidato socialista á presidencia da Xunta, Gonzalo Caballero, e no que o ministro lembrou que, nos últimos meses, se aprendeu “moito”.
Entre as ensinanzas que deixou, ao seu xuízo, a pandemia, está a importancia dos organismos internacionais, porque “non se pode derrotar unha pandemia internacional sen institucións internacionais”, que son as que fixan as “regras comúns” e achegan información común aos países.
“Algúns queren levalas por diante, hai países que comunicaron que se dan de baixa. Craso erro, como imos combater isto sen organismos internacionais que coordinen?”, cuestionou nesta xornada, na que se soubo que Estados Unidos comunicou formalmente á ONU a saída da OMS, tal e como avanzara Trump.
Salvador Illa sinalou tamén que a crise sanitaria supuxo unha lección de “humildade” e de “respecto á Ciencia”, ante un virus descoñecido, así como un impulso á “solidariedade”.
SANIDADE PÚBLICA “IMPRESCINDIBLE”
O ministro de Sanidade subliñou que outra das cousas que se aprenderon nos últimos meses é que é “imprescindible” ter unha “sanidade pública, universal e gratuíta“. “A sanidade non é un gasto, é un investimento. Algúns que non o sabían, a ver se se decataron xa, que sería do noso país nestes 4 meses sen unha sanidade pública, universal e gratuíta?”, cuestionou.
Por iso, pediu que se invista “máis diñeiro” neste servizo público, e que “todas as Comunidades Autónomas expliquen onde invisten o diñeiro”, á vez que pediu tamén máis recursos para os equipos de saúde pública e os epidemiólogos.
Illa, por outra banda, subliñou que a pandemia foi como un “espello” no que se viu “o mellor” da sociedade (a cooperación institucional, a actitude “exemplar” dos cidadáns ou o traballo dos profesionais sanitarios), pero tamén “o peor”, como “algunhas escenas de incivismo” ou actitudes de “confrontación estéril que non serve para nada”. “Isto vai de derrotar ao virus, non de pelexarse”, apostilou.
