A presidenta da Deputación de Pontevedra, Carmela Silva, expresou este luns o seu “enfado” polo feito de que o PP “asuma” certos postulados do partido “fascista” Vox, e tachou de “vergoña” esa actitude, que fai que os ‘populares’ deixen de ser “cribles” cando falan de igualdade.
Silva fixo estas manifestacións durante un almorzo informativo en Vigo, en referencia a unha visita da secretaria xeral de Igualdade, Susana López Abella, á cidade, para informar a asociacións sobre as axudas para promover a igualdade.
“O PP vén hoxe a Vigo a falar de igualdade, e habería que preguntarlles sobre o veto parental, a violencia de xénero ou sobre esas comunidades que deixaron de financiar a loita contra esa violencia”, proclamou, á vez que lembrou que, só no que vai de 2020, xa unha decena de mulleres foron asasinadas.
A ese respecto, subliñou que lle “enfada moitísimo” que haxa partidos como Vox, unha formación “fascista”, que negan a violencia machista e falan de violencia doméstica, ou que propoñen un pin parental. “Pero enfádame máis que o PP asuma esas cuestións”, engadiu, e recalcou que “os que fan iso non son cribles, porque isto vai de crerllo”.
“DOBRE MORAL”
Pola súa banda, o grupo provincial do PP, censurou a “dobre moral” da presidenta da Deputación, á que acusan de “politizar” a loita pola igualdade. “Xa está ben de etiquetar as feministas polo partido no que militen”, proclamou a portavoz ‘popular’, Pepa Pardo.
Pardo afirmou que o PP non acepta “leccións de igualdade nin de feminismo” de Silva, de quen afirmou que, mentres fai discursos en favor desa igualdade, “vota en contra” de iniciativas na Deputación para favorecer a conciliación e a corresponsabilidade simplemente porque parten deste grupo político. “Esa dobre moral do PSOE xa non nos convence a ninguén”, sentenciou.
SECRETARIA XERAL DE IGUALDADE
A secretaria xeral de Igualdade, Susana López Abella, reuniuse este luns con entidades locais en Vigo para explicar as axudas para a promoción da igualdade, ás que a Xunta dedica este ano uns 6,5 millóns de euros. Trátase de axudas en catro programas ás que se poden acoller entidades locais de todos os concellos.
Ademais, con motivo da súa presenza ante os medios, López Abella aproveitou para expresar a “consternación” do goberno galego ante un novo crime de violencia machista, ocorrido este fin de semana en Lugo, e trasladou á familia da vítima e ao concello de Lugo o “pésame” e “agarimo” da Xunta de Galicia.
Así mesmo, púxose “a disposición” dos familiares e achegados desa muller, que foi supostamente asasinada pola súa parella no barrio das Gándaras, e subliñou que o goberno autonómico seguirá achegando “recursos” e traballando na “sensibilización” para acabar con esta violencia. “E lembrar ás mulleres que estean a sufrir algún tipo de violencia, que chamen ao 016 ou ao 900 400 273 e que, por favor, pidan axuda para pór en marcha o sistema de apoio”, engadiu.
