O BNG presentou este martes no Concello de Vigo unha proposta para que o pleno faga unha declaración institucional na que rexeite a creación dunha universidade privada en Galicia.

Segundo informou o concelleiro nacionalista, Xabier Pérez Igrexas, a través dun comunicado, esta iniciativa “recolle as posicións expresadas polos diferentes sectores da comunidade educativa universitaria, desde os reitores, ata as organizacións sindicais e estudantís”.

Así, con esta declaración búscase fixar unha “posición de cidade” ante o proxecto de universidade privada promovido “por unha entidade bancaria”, e que contempla establecer un dos seus campus en Vigo.

O concelleiro do BNG pediu que o pleno municipal, “como máximo órgano democrático”, transmita así “unha mensaxe clara contra este proxecto privatizador”. No texto proposto ínstase tamén á Xunta a atender “o clamor” da comunidade universitaria e a non autorizar esa iniciativa, “que incumpriría o previsto na propia lei galega de universidades”, con respecto á duplicidade de titulacións e estudos.

Así mesmo, o BNG reclama na súa proposta que se demande un novo plan de financiamento para a universidade pública, que viu reducidas as achegas da Xunta pola “política de recortes” do PP.