O presidente da Xunta, Alberto Núñez Feijóo, lamentou o falecemento de Manoel Soto, primeiro alcalde de Vigo da democracia, e agradeceulle “os servizos prestados” á Alcaldía da cidade e tamén á política baixo as siglas do PSdeG, partido que deixou a finais da década dos 90.

“Tiven unha relación moi cordial con el desde que son presidente e tamén cunha das súas fillas, á que coñezo. Non podo máis que lamentar o seu falecemento”, trasladou Feijóo, quen lembrou, tras o Consello da Xunta, unha mensaxe telefónica que lle enviou Soto na que, segundo o presidente, lle trasladaba boas noticias sobre o estado da súa enfermidade.

“Era unha persoa vitalista, optimista e que sempre me animaba a seguir traballando en política. Laméntoo profundamente”, recalcou, a continuación, antes de enviar unha aperta á familia do que fora primeiro rexedor da democracia en Vigo, tras a ditadura franquista.

Finalmente, agradeceulle “os servizos prestados” á Alcaldía da cidade e tamén á política.