O Ministerio de Defensa concedeu ao alcalde de Vigo, Abel Caballero, a Gran Cruz do Mérito Naval coa distinción branca.  Segundo recolle o Boletín Oficial do Estado (BOE) este venres, este recoñecemento faise por proposta da ministra de Defensa, Margarita Robles, e logo da deliberación do Consello de Ministros.

Todo iso, “en atención aos méritos e circunstancias que concorren en don Abel Caballero“, o que o fai acreedor da Gran Cruz do Mérito Naval coa distinción branca, segundo sinala o BOE.  Esta distinción militar concédese a persoas polos seus méritos, traballos, accións, feitos ou servizos distinguidos, que se leven a cabo durante a prestación das misións ou servizos que ordinaria ou extraordinariamente lles sexan encomendados ás Forzas Armadas ou que estean relacionados coa Defensa.

Nado en 1956, Caballero é doutor en Economía polas Universidades de Cambridge e Santiago de Compostela. Ademais, posúe un máster en Economía pola Universidade de Essex. Entre a súa ampla formación tamén se inclúe a de Piloto da Mariña Mercante pola Escola da Coruña.