A Federación de Servizos, Mobilidade e Consumo da Unión Xeral de Traballadoras e Traballadores (FeSMC-UGT) de Galicia presentou unha denuncia ante a Inspección Provincial de Traballo en Vigo contra Kebel Logistics. O sindicato acusa a esta firma, que opera como subcontrata de Amazon e da plataforma Glovo para a repartición de pedidos, de “coaccionar” aos empregados para que asinen baixas voluntarias.
Nun comunicado, a organización asegura que a compañía está a desenvolver unha “maniobra agresiva e desesperada de coacción” contra os seus repartidores co obxectivo de “dinamitar as eleccións sindicais” convocadas para o vindeiro 21 de maio. Segundo detalla UGT, a dirección da empresa, tras ter coñecemento de que o sindicato articulaba unha candidatura democrática cos repartidores de Glovo, desatou unha “caza de bruxas”. A central sindical afirma que os responsables da contrata están a remitir mensaxes imperativas e individuais por WhatsApp aos traballadores para obrigalos a asinar documentos de baixa voluntaria.
CHANTAXE FRAUDULENTO AO COLECTIVO
Para dobrar a vontade dos repartidores —un colectivo exposto a unha precarización extrema e dependente de Amazon e das plataformas de reparto— a empresa recorre, segundo UGT, a un “chantaxe tóxico e fraudulento”. O sindicato explica que se lles pide que daten a súa “dimisión” o 17 de maio baixo a “falsa promesa de que os volverán reincorporar de forma idéntica o 25 de maio ou o 1 de xuño”.
A organización cualifica os feitos de “insulto á democracia e aos dereitos da clase traballadora” e non tolera que unha empresa que xestiona os pedidos de Amazon na comarca empregue estes métodos para amordazar os repartidores. Por este motivo, exixen que a Inspección de Traballo se persone de forma inmediata na sede da empresa en O Porriño, paralice este fraude e sancione exemplarmente aos responsables. UGT advirte ademais que chegará ata as últimas consecuencias ante os tribunais se fose necesario, exixindo a declaración de “nulidade radical” de calquera cese fraudulento.
